Lent.az
"Bavariya" 35 yaşlı yarımmüdafiəçi Tomas Müllerin X sosial media hesabında (keçmiş Twitter) cari mövsümün sonunda klubu tərk edəcəyi ilə bağlı açıqlamasına cavab verib.
Lent.az xəbər verir ki, klubun açıqlamasında Müllerin iyul ayında "Bavariya"nın heyətində son oyununu keçirəcəyi qeyd olunub:
"Almaniya rekordçusu Müller görkəmli karyerasını öz vida oyunu ilə qeyd edəcək. Həmçinin qərara alınıb ki, ikiqat trebl sahibi və dünya çempionu ABŞ-da iyunun 15-dən iyulun 13-dək keçiriləcək Klublararası Dünya Çempionatında "Bavariya"nın heyətində son oyunlarını keçirsin".
Müller 2000-ci ildən "Bavariya"nın sistemindədir. Bu müddət ərzində yarımmüdafiəçi bütün turnirlərdə 743 oyunda iştirak edib, 247 qol vurub, 273 məhsuldar ötürmə edib. Münhen komandasının heyətində Müller 12 dəfə Almaniya çempionu olub, iki dəfə Çempionlar Liqasının qalibi olub.
