Idman.biz
Dünyaca məşhur azərbaycanlı alpinist İsrafil Aşurlı ekspedisiyada növbəti həmkarını xilas edib.
İdman.biz-ə eksklüziv açıqlamasında İsrafil Aşurlı bildirib ki, onun sayəsində polşalı alpinist Valdemar Kovalevski xilas olunub.
Hadisə Pakistanın Karakorum dağ sistemində baş verib. K2 və "Broad Peak" zirvələrinin baza düşərgələri bir-birindən təxminən 3 km məsafədə yerləşir. Aşurlı deyir: "Mən K2-nin baza düşərgəsində idim və həmin zirvəyə qalxmağı planlaşdırırdım. Hadisə "Broad Peak"də baş verdi. Polşalı alpinist Valdemar Kovalevski ora qalxmağa çalışarkən bizdən təxminən 3 km aralıda qar uçqununun altında qaldı. Polşalı alpinistin problemləri ilə bağlı məlumat uçqunun ertəsi günü yayıldı".
Azərbaycanlı və polşalı alpinistlər 2019-cu ildən tanışdırlar və üç dəfə müxtəlif zirvələrdə qarşılaşıblar. Aşurlı sözlərinə davam edir: "Valdemarın kritik vəziyyətdə olduğunu, hərəkət edə bilmədiyini və pis hava şəraiti səbəbindən ona yardım göndərilmədiyini öyrənən kimi K2-nin baza düşərgəsində olarkən dərhal şerpalarla əlaqə saxladım. Onlar yüksəkdə işləməyə ən hazırlıqlı şəxslərdir. Qeyd edim ki, "Broad Peak"də hadisənin baş verdiyi baza düşərgəsində bir neçə alpinist qrupu var idi, amma heç kim köməyə getmədi".
Xilasetmə əməliyyatı üçün "Broad Peak"də yalnız bir gün hava əlverişli olub: "Qeyd edildiyi kimi, zirvədə olan ekspedisiya qrupları xilasetmədə iştirak etməkdən imtina etdi. Şerpalarla razılığa gəlmək də çətin oldu, çünki onların digər qruplara öhdəlikləri vardı. Nəticədə üç şerpa – Davasange, Miktemba və Pasangla razılıq əldə olundu".
İsrafil Aşurlı xilasetmə əməliyyatında birbaşa iştirak edib, vizual əlaqəni təmin edib və lazım gəldikdə fiziki yardım göstərib: "Valdemarla ikinci düşərgə yaxınlığında görüşdük və birlikdə enişə başladıq. O, xüsusi mata və polietilenlə bükülmüşdü ki, bu da qar, buz və qayalarda sürüşməyə imkan verirdi. Beləliklə, onu sürətlə birinci düşərgəyə endirdik, oradan qaranlıq düşənə qədər marşrutun başladığı nöqtəyə çatdırdıq. Daha sonra daşıyıcılar Valdemarı baza düşərgəsinə apardılar".
Bu xilasetmənin özəlliyi insanlar arasında düzgün əlaqə yaratmaq və hadisədən bir gündən artıq müddət ərzində mövcud olmayan qarşılıqlı əlaqəni təşkil etmək idi. Aşurlı deyir: "Bu işi bacardığıma, alpinistin xilas olunmasında təşkilatçı kimi çıxış etdiyimə və əsas koordinator olduğuma görə şadam. Bununla belə, sadəcə baza düşərgəsində olmamışam, əməliyyatın özündə də birbaşa iştirak etmişəm. İlk növbədə çağırışıma cavab verən, yaxşı komanda şəklində birləşərək xilasetmə əməliyyatını peşəkarcasına həyata keçirən şerplərə təşəkkürümü bildirmək istəyirəm. Əgər həmin gün bu əməliyyatı həyata keçirmək mümkün olmasaydı, hava şəraiti səbəbindən bir neçə gün gözləməli olacaqdıq və zədələnmiş Valdemara nə olacağı bəlli deyil".
Qeyd edək ki, azərbaycanlı alpinistin həmkarlarını xilas etməsi ilk dəfə deyil.
Aşurlı 2022-ci ilin iyulunda elə həmin "Broad Peak"də təxminən 7700-7800 metr hündürlükdə ağır vəziyyətdə olan rumıniyalı alpinist Ceo Badeanı aşkar edib, zirvəyə çıxışını dayandıraraq zərərçəkəni 7300 metrə qədər endirib, orada isə digər alpinistlər də köməyə gəliblər.
2023-cü ilin iyulunda isə Pakistanın Nanga Parbat zirvəsinə yaxınlaşarkən Aşurlı zirvəyə qalxmaqdan imtina edib və xilasetmə işlərinə başlayıb: onun ümidsiz vəziyyətdə tapdığı polşalı alpinist Pavel Kopets oradaca vəfat edib. Aşurlı qar korluğu səbəbilə görmə qabiliyyətini itirmiş pakistanlı Asif Bhattini isə əvvəl C3 düşərgəsinə, sonra isə C2-yə qədər çatdırıb. Orada onları pakistanlı alpinistlər qarşılayaraq əsas düşərgəyə endiriblər.
İdman.biz
