Idman.biz
"Mançester Yunayted" və İngiltərə millisinin keçmiş yarımmüdafiəçisi Devid Bekhemin böyük oğlu Bruklin Bekhem, ailənin mediada həddindən artıq işıqlandırılması ilə bağlı uzun müddətdir davam edən mübahisə fonunda sosial mediada valideynlərinə qarşı sərt çıxış edib.
İdman.Biz xəbər verir ki, Devid və Viktoriyanın 26 yaşlı böyük oğlu ailəsi ilə barışmaqdan imtina etdiyini və həyatında ilk dəfə hüquqlarını müdafiə etdiyini bildirən bir bəyanat yayıb.
"Mən illərdir susmuşam və bu məsələləri gizli saxlamaq üçün əlimdən gələni etmişəm. Təəssüf ki, valideynlərim və onların komandası bütün bunları mətbuatda yayımlamağa davam edir. Mənim özüm üçün danışmaqdan və dərc olunmuş bəzi yalanlar haqqında həqiqəti deməkdən başqa çarəm qalmayıb. Ailəmlə barışmaq istəmirəm. Məni heç kim idarə etmir və həyatımda ilk dəfədir ki, hüquqlarım uğrunda mübarizə aparıram. Sosial şəbəkədə nümayişkaranə paylaşımlar, ailə tədbirləri və qeyri-səmimi münasibətlər doğulduğum həyatın ayrılmaz hissəsi olub" – Bruklin Bekhem öz sosial şəbəkə hesabında yazıb.
O, həmçinin atasını tənqid edərək, Devidin 50 illik yubileyini qeyd etmək üçün Böyük Britaniyaya gəldiyini, lakin görüş üçün dəfələrlə edilən xahişlərin yalnız Bruklinin həyat yoldaşı Nikola Peltzin dəvət olunmadığı təqdirdə yerinə yetiriləcəyini bildirib.
Əvvəllər Bruklinin valideynlərini sosial mediada blokladığı bildirilirdi. Çünki valideynlərinin onun paylaşımlarını bəyənməsi belə, həyat yoldaşı ilə münasibətlərinə dair ictimai müzakirələrə səbəb olub. Kiçik Bekhem həmçinin valideynlərini onunla yalnız vəkillər vasitəsilə ünsiyyət qurmağa çağırıb.
