Idman.biz
Serbiyanın Novi-Pazar şəhərində keçirilən boks üzrə yeniyetmələr arasında Avropa birinciliyinin qalibi Əminə Tağı Oxu.az-a müsahibəsi verib.
İdman.biz xəbər verir ki, gənc idmançı final döyüşünə xüsusi hazırlaşdığını deyib.
- Əminə xanım, ilk olaraq sizi təbrik edirik! Avropa birinciliyində qələbə qazanmaq necə hissdir?
- Çox xoşbəxtəm və fəxr edirəm. Ürəyimdə uzun müddət gəzdirdiyim arzumu həyata keçirdim.
- Bu yarışa hazırlaşmaq sizin üçün nə qədər çətin və məsuliyyətli oldu?
- Çox çətin və məsuliyyətli idi. Hər məşqdə maksimum gücümü verməli idim, həm fiziki, həm də ruhi olaraq özümü hazırlamalı idim. Hər dəfə fikirləşirdim ki, bu yarış mənim gələcəyim üçün önəmlidir, ona görə də heç vaxt geri çəkilmədim.
- Rəqibinizin erməni idmançı olması sizdə əlavə motivasiya yaratdı, yoxsa bu sadəcə növbəti döyüş kimi idi?
- Mən idmançıyam və hər döyüşə eyni ciddiliklə yanaşıram. Rəqibin erməni olması mənim üçün əsas deyil, əsas məqsəd qalib gəlməkdir. Siyasətdən kənar idim, sadəcə döyüşə hazırlaşırdım.
- Döyüş zamanı taktikanız nə idi və rəqibinizi necə analiz etdiniz?
- Finaldaki rəqibim ikiqat Avropa çempionu idi. Döyüşdən əvvəl onun bütün görüşlərini yenidən izlədim və rinqdə necə davrandığını bildim. Rəqibimin zəif tərəflərini əvvəlcədən analiz etmişdim və onları vurmağa diqqət yetirdim. Fikirləşirdim ki, çox çətin olacaq, amma döyüşdə gördüm ki, düşündüyümdən daha asan oldu. Bu məni özümə daha da inandırdı və öz işimi görməyə imkan verdi.
- Ən kritik an sizcə hansı oldu və o anda nə düşündünüz?
- Mənim üçün ən kritik an üçüncü raund idi. O raundda mən tam gücümlə vuruşmalı, gücümü tam verməli idim ki, qalib gəlim. Raundun hər saniyəsi çox vacib idi və buna görə də bütün diqqətim orada idi.
İdman.biz
