Idman.biz
Azərbaycanın "Xilasedici" voleybol klubu ilk oyunda üzləşdiyi çətinliklərə baxmayaraq, Çellenc Kubokunda 1/8 finala yüksəlmək əzmindədir.
Bu barədə İdman.Biz-ə komandanın baş məşqçisi Cəlil Cəlilov məlumat verib.
O vurğulayıb ki, komanda ilk oyundakı 0:3 hesablı məğlubiyyətdən sonra tam olaraq özünə gəlib.
"Bəli, qələbə rəqibə müəyyən psixoloji üstünlük verir, lakin biz də son dərəcə qətiyyətliyik və oyunu qazanaraq qarşılaşmanı "Qızıl set"ə daşıyacağımıza ümid edirik. Təəssüf ki, oyunçuların viza problemləri səbəbindən iki transferi reallaşdıra bilmədik, amma əlbəttə ki, bu, mümkün uğursuzluq üçün bəhanə olmayacaq. Problemləri evdəki oyunda uduzmaqla özümüz yaratmışıq və yanvarın 7-də Belçikada vəziyyəti xilas etməyə, klubumuzun adına layiq olmağa çalışacağıq", – deyə Cəlil Cəlilov bildirib.
Qeyd edək ki, "Xilasedici"nin "Lindemans"la cavab oyununda yalnız 3:0 və ya 3:1 hesablı qələbə variantı sərf edir. Bu halda turnirin reqlamentinə əsasən, növbəti mərhələyə vəsiqənin sahibi "Qızıl set"də müəyyənləşəcək. Həmin setin qalibi Çellenc Kubokunun 1/8 finalına yüksələcək.
