Idman.biz
Polina Rəhimova Yunanıstan liqasında özünü rahat hiss edir. Azərbaycan millisinin voleybolçusu olduğu "Panionios" klubu liqada üçüncü pillədə qərarlaşıb, həmçinin Çellenc Kubokunda iki mərhələni keçərək 1/8 finala yüksəlib.
İdman.Biz ilə söhbətində hücumçu yeni klubunda oyun təəssüratlarını bölüşüb, yaxın turnir vəzifələrindən və Yunanıstandakı həyatından danışıb.
"Hazırda biz Yunanıstan liqasında səkkiz qələbəlik seriyaya gedirik, üçüncü pilləyə yüksələ bilmişik, yalnız "Panatinaikos" və "Olimpiakos"dan geri qalırıq. Amma tələblər çox yüksəkdir və bir çoxları "Panionios"dan çempionluq gözləyir, çünki klub böyük maliyyə sərmayəsi qoyub. Rəhbərlik bizdən yüksək nəticələr gözləyir və hesab edir ki, klub bütün turnirlərdə uğurla çıxış edə bilər. Yalnız milli çempionat deyil, həm də Kubok və Yunanıstan Superkuboku, eləcə də Avrokuboklarda", - deyə P. Rəhimova qeyd edib.
Onun sözlərinə görə, oyun cədvəli kifayət qədər sıxdır.
"Həftədə iki dəfə oynayırıq. Bir neçə gün əvvəl çempionatda "Zirinios"u məğlub etdik, bir gün öncə isə "Ilisiakos"a qalib gəldik. Çellenc Kuboku barədə isə 1/8 finalda İspaniyanın "Eskimo" komandası ilə qarşılaşacağıq. İlk oyun yanvarın 9-da səfərdə keçiriləcək, cavab görüşü isə yanvarın 16-da olacaq", – deyə Polina bildirib.
Bundan əlavə, ilin sonuna qədər "Panionios" mövsümün ilk kuboku uğrunda matç keçirəcək. Dekabrın 23-də Superkubok uğrunda "Olimpiakos"la qarşılaşacaq. "Superkubok sahibinin müəyyənləşdirilməsi yalnız bir oyun nəticəsində baş verir, buna görə də bu bizim üçün böyük oyundur və ciddi şəkildə hazırlanırıq. Eyni zamanda kubok qarşılaşmasından əvvəlki oyunlara da hazırlaşırıq. Maraqlısı budur ki, çempionatın əvvəlki turunda səfərə getdik və həmin zalda "Olimpiakos"la oyun oynayacağıq. Zal kiçikdir, tavan aşağıdır və artıq onu sınaqdan keçirmişik", - deyə Rahimova vurğulayıb.
Həmçinin voleybolçu Yunanıstanda yaşamaq təəssüratlarını bölüşüb.
"Hərçənd ki, qışdır, amma burada iqlim çox isti və rahatdır. Dəniz kənarına yaxın yaşayıram, tez-tez sahil boyu gəzintiyə çıxıram. Həmçinin yaxınlıqda Köhnə Şəhər yerləşir, Afina da çox uzaqda deyil. Yerli sakinlərin mentaliteti bəzən Türkiyəyə bənzəyir. Əgər keçən mövsümü Braziliya ilə müqayisə etsək, fərq çox böyükdür. Yunanıstanda voleybol o qədər də populyar deyil. Amma bütün komandaların "ultras" adlanan azarkeş qrupları var. Amma azarkeşlik mədəniyyəti Braziliyadakından fərqlidir. Mən yeni ölkədə bu çağırışı qəbul etməkdən məmnunam. Həmçinin bir neçə ada ziyarət etməyi planlaşdırıram. Santorinidə oynadıq – çox gözəl bir yerdir. Elə bil nağıldayam", – deyə Polina əlavə edib.
