Idman.biz
Almaniyanın Reyn-Rur bölgəsində keçirilən Universiadada çimərlik voleybolu yarışları çətin hava şəraitində davam edir.
İdman.biz-in Almaniyaya ezam olunmuş əməkdaşı xəbər verir ki, Azərbaycan komandasının da çıxış etdiyi Duysburq İdman Parkında hava şəraiti tamamilə çimərlik voleybolu üçün uyğun deyil.
Yağış səbəbindən oyunlar bir neçə dəfə dayandırılıb, həmçinin fırtına xəbərdarlığı səbəbindən meydança qısa müddətə boşaldılıb.
Lakin bütün bunlar hələlik idmançılarımızın çıxış cədvəlinə təsir etmir.
Qadınların yarışında Səbinə Əlizadə və Fidan Əhmədxanova bu gün multiforumda ikinci oyunlarını keçiriblər. Onlar litvalı cütlük Krizanauskayte-Rutkovskayaya iki setdə məğlub olublar. Bu, onların Universiadada ikinci məğlubiyyətidir.
Sonra kişilərdən ibarət duetimiz Nəriman Bayramlı və Ayxan Abdullayev meydançaya çıxacaq. Onları avstriyalı Klemen və Spoler cütlüyü gözləyir.
Zəki Feyzullayev
İdman.biz
