Idman.biz
Azərbaycanın kişilərdən ibarət voleybol millisi Avropa Gümüş Liqasının liderlərindən biri ilə qarşılaşacaq.
İdman.biz xəbər verir ki, iyunun 13-15-də Bakıda turnirin növbəti oyunları keçiriləcək.
Fərid Cəlalovun başçılıq etdiyi komanda evdəki yarışa Lüksemburqla oyunla başlayacaq. Rəqib turnirə uğurlu start verib: Avstriyanı 3:1, İslandiyanı isə 3:0 hesabları ilə məğlub edərək iki qələbə qazanıb.
Lüksemburq yığması 6 xal toplayaraq turnir cədvəlində ikinci pillədə qərarlaşıb, yalnız set fərqinə görə İsveçdən geri qalır.
Azərbaycan və Lüksemburqun kişi voleybol komandalarının qarşılaşmalarının öz tarixçəsi var. Rəqiblər əvvəllər üç dəfə üz-üzə gəliblər: Azərbaycan millisi Avropa çempionatının seçmə mərhələsi çərçivəsində hər iki görüşdə qalib gəlib, lakin ötən il Avropa Qızıl Liqasında 2:3 hesabı ilə məğlub olub.
Bu baxımdan, həmin məğlubiyyətin əvəzini çıxmaq üçün yaxşı fürsət var.
Azərbaycan millisi iyunun 15-də isə Bakıda Macarıstanla qarşılaşacaq.
Qeyd edək ki, komandamız turnirə İsveçin Umeo şəhərində keçirilən mərhələdə meydan sahiblərinə 0:3 hesabı ilə uduzaraq başlayıb, daha sonra Gürcüstanı 3:0 hesabı ilə məğlub edib.
İdman.biz
