Idman.biz
Azərbaycanlı şahmatçı Ülviyyə Fətəliyeva Səmərqənddə (Özbəkistan) keçirilən nüfuzlu "Grand Swiss" turnirini ilk onluqda başa vuraraq rusiyalı şahmatçı Katerina Laqnoya yarışın qalibi olmağa imkan verməyib.
İdman.biz-in məlumatına görə, Fətəliyeva son turda neytral statusda çıxış edən rusiyalı Katerina Laqno ilə bərabərə qalıb.
Nəticədə şahmatçımız 7 xal toplayaraq yekun turnir cədvəlində altıncı yeri tutub. Ümumilikdə Fətəliyevanın Marina Muzıçuk (Ukrayna) və Aleksandra Kostenyuk (İsveçrə) kimi güclü rəqibləri üzərində olmaqla, beş qələbəsi, həmçinin dörd heç-heçəsi və iki məğlubiyyəti var.
Öz növbəsində, digər azərbaycanlı şahmatçı Xanım Balacayeva altı xal toplayaraq 17-ci, Gövhər Beydullayeva isə 4,5 xalla 44-cü yerdə qərarlaşıb.
Qadınların turnirinin qalibi 8 xal toplayan Rameşbabu Vaişali (Hindistan) olub. Katerina Laqno eyni qədər xal toplayıb, lakin o, əlavə göstəricilərə görə hindistanlı şahmatçıdan sonrakı yeri tutub.
Məhz qara fiqurlarda oynayan Ülviyyə Fətəliyeva ilə heç-heçə Laqnonun birinci yerə yüksəlməsinə mane olub.
İdman.biz
