Idman.biz
Azərbaycan qrossmeysteri Şəhriyar Məmmədyarov Gürcüstanın Batumi şəhərində keçirilən Avropa çempionatının startında komanda yarışlarında qazandığı iki qələbə sayəsində dünya reytinqində mövqeyini yaxşılaşdırıb.
İdman.biz xəbər verir ki, qitə birinciliyinin ilk iki turunda kişi yığmamız Slovakiyanı 3:1 hesabı ilə məğlub edib, Çexiya ilə isə 2:2 hesablı heç-heçə oynayıb.
Birinci lövhədə çıxış edən Məmmədyarov hər iki görüşdə qələbə qazanıb - slovakiyalı Yarqus Peçak və çexiyalı Tay Nquyen üzərində inamlı oyun nümayiş etdirib. Bu nəticələr ona 6,3 xal qazandırıb və ümumi göstəricisini 2748,3-ə çatdıraraq 14-cü pillədən 13-cü yerə yüksəlib.
Hazırda 12-ci pillədə qərarlaşan çinli Vey İ ilə onu cəmi 0,5 xal ayırır. Hindistanlı dünya çempionu Domacu Qukeşin tutduğu 10-cu pilləyə isə 3,7 xal çatmır. Əgər Şəhriyar Məmmədyarov Avropa çempionatında qələbə seriyasını davam etdirsə, yarışın sonunda yenidən dünyanın "top-10"luğuna qayıda bilər.
Turnirin üçüncü turunda Azərbaycan millisi Polşa yığması ilə qarşılaşacaq. Çexiyaya qarşı görüşdə uduzan Rauf Məmmədov bu dəfə heyətdə yer almayacaq.
Qadınlardan ibarət yığmamız isə əvvəlki turda güclü Macarıstan komandası üzərində 2,5:1,5 hesablı qələbə qazanıb. Uğura Ülviyyə Fətəliyeva və Ayan Allahverdiyeva imza atıb, yeganə məğlubiyyəti Xanım Balacayeva alıb.
Dörd mümkün xaldan dördünü toplayan xanım şahmatçılarımız liderlər qrupunda yer alır. Üçüncü turda komanda Fransa ilə qarşılaşacaq. Bu dəfə heyətə Gülnar Məmmədova qayıdıb, Gövhər Beydullayeva isə dincələcək.
Teymur Tuşiyev
