Sport24.az
"Artıq neçə ildir ki, Azərbaycan dünya şahmat izləyicilərinin diqqət mərkəzinə çevrilir. Çox xoş haldır ki, builki turnir Qarabağda keçirilir. Vüqar Həşimov Memorialı turniri Qarabağ bölgəsində ikinci ildir ki, baş tutur. Yaradılan bu gözəl şəraitə görə cənab Prezident İlham Əliyevə dərin minnətdarlığımı bildirirəm. Bu turnir dünya şahmat standartlarına uyğun olaraq keçirilir. Yarışın bütün iştirakçılarına uğurlar arzu edirəm".
Sport24.az-ın Xankəndiyə ezam olunmuş əməkdaşı xəbər verir ki, bu sözləri Azərbaycan Şahmat Federasiyasının prezidenti Mahir Məmmədov Vüqar Həşimov Memorialı 2025 turnirinin açılış mərasimindən sonra deyib.
O, jurnalistlərin suallarını da cavablandırıb.
- Turnirin mükafat fondu barədə məlumat verə bilərsiz?
- Bu barədə Vüqar Həşimov Memorialı Fonduna müraciət etsəniz, daha yaxşı olar.
- Şəhriyar Məmmədyarovun builki turnirdə iştirak etməməsi nə ilə bağlıdır?
- Verdiyi vədlər, müqavilədə imzaladığı bəndlər var. Yəqin ki, bununla bağlıdır.
- Uzun illər AFFA İcraiyyə Komitəsinin üzvü olmusuz. İlin ən yaxşı komandası kimi "Qarabağ" klubunu, yoxsa dünya ikincisi olan qadınlardan ibarət millimizi seçərdiz?
- Birinci-ikinci yerlərə bölüşdürərdim (gülür).
