Idman.biz
Azərbaycanlı qrossmeyster Eltac Səfərli ümid edir ki, Batumidə keçirilən milli komandaların Avropa çempionatındakı uğuru onların komandasına Ümumdünya Şahmat Olimpiadasında medal uğrunda mübarizə aparmağa imkan yaradacaq.
Bu fikirləri Azərbaycan millisinin heyətində fərdi qızıl medal qazanan Eltac Səfərli İdman.Bizə müsahibəsində səsləndirib.
Xatırladaq ki, Azərbaycanın kişi şahmat millisi Batumidə keçirilən qitə birinciliyində gümüş medal qazanıb. Sonuncudan əvvəlki turda azərbaycanlı şahmatçılar Ukrayna üzərində 2,5:1,5 hesablı qələbə qazanaraq qızıl medallar üçün şanslarını saxlasalar da, yekun turda Serbiyaya 1:3 hesabı ilə məğlub olaraq Avropa ikincisi olublar.
"Medal qazanmaq həmişə xoşdur. Yanılmıramsa, bu, artıq millimizin altıncı medalıdır. Ümumilikdə komandanın çıxışını ən azı yaxşı adlandırmaq olar", – deyə Səfərli bildirib.
Son turda serblərlə oyundakı məğlubiyyətə toxunan şahmatçı deyib:
"Son turda biz təbii ki, qələbə üçün oynayırdıq. Təəssüf ki, belə alındı, amma bir şeyi deyə bilərəm - uşaqlar ilk turdan son tura qədər bütün güclərini qoydular. Sonradan məlum oldu ki, çempion olmaq üçün Serbiyanı 3,5:0,5 hesabı ilə məğlub etməliydik. Belə güclü rəqibə qarşı bu, çox çətindir", – deyə E. Səfərli vurğulayıb.
Qeyd edək ki, Azərbaycan Şahmat Federasiyasının birinci vitse-prezidenti Faiq Həsənov daha əvvəl İdman.Bizə açıqlamasında bildirmişdi ki, 20 il əvvəl o, xal bərabərliyi halında qalibi müəyyənləşdirmə sisteminin dəyişdirilməsini və ilk növbədə şəxsi görüşlərin nəticəsinin nəzərə alınmasını təklif etmişdi. Bu halda Serbiya ilə matçdakı strategiya fərqli ola bilərdi, çünki millimiz artıq Ukrayna üzərində qələbə qazanmışdı.
Lakin Səfərli bu məsələni şərh etmək istəməyib:
"Əsas olan yaxşı oynamaq və nəticə göstərməkdir. Xal hesablaması barədə isə təşkilatçılar düşünsünlər. Mənim fikrim burada heç nəyi dəyişməyəcək".
Fərdi uğuruna toxunan qrossmeyster bu mükafatı əsas məqsəd saymadığını qeyd edib:
"Bu, təbii ki, xoşdur, amma mən bu medalı əlavə bir bonus kimi qəbul edirəm. Mənim üçün əsas olan Azərbaycan millisinin uğurudur", – deyə o əlavə edib.
Səfərlinin fikrincə, son səkkiz ildə ilk dəfə medal qazanan Azərbaycan kişi şahmat millisi bu nəticə sayəsində Olimpiadadan öncə daha inamlı olacaq.
"Ümid edirəm ki, bu medal bizə doğrudan da inam verəcək. Gələn il Olimpiadadır və biz çalışacağıq ki, layiqli çıxış edək və medallar uğrunda mübarizə aparaq", – deyə Eltac Səfərli fikrini tamamlayıb.
Teymur Tuşiyev
