Idman.biz
Gürcüstanın Batumi şəhərində keçirilən şahmat üzrə milli komandalar arasında Avropa çempionatında Azərbaycanın kişi yığması liderləri izləməyə davam edir, xanımlarımız isə cari yarışda ilk dəfə məğlub olub.
İdman.biz-in məlumatına görə, qitə birinciliyində dördüncü turun oyunları başa çatıb.
Bu tur Azərbaycan şahmatçıları üçün qələbəsiz keçib.
Kişilərdən ibarət yığmamız turnirin favoritlərindən biri – Niderland komandası ilə qarşılaşıb. Bütün partiyalar heç-heçə başa çatıb və matç 2:2 hesabı ilə nəticələnib. Bununla da Azərbaycan şahmatçılarının aktivində altı xal var və rəqiblərlə 3–9-cu yerləri bölüşür. Lakin əlavə göstəricilərə əsasən, komandamız hazırda siyahıda konkret olaraq beşinci pillədə qərarlaşıb.
Turnir cədvəlinə maksimum səkkiz xalı toplayan Serbiya millisi başçılıq edir. Onlardan bir xal geri qalan Ukrayna komandası ikinci yerdə qərarlaşıb.
Beşinci turda kişi şahmatçılarımız Yunanıstan yığması ilə qarşılaşacaq. Rəqib komanda ötən turda lider serblərə 1,5:2,5 hesabı ilə uduzub. Komandamızda bu dəfə iki turu buraxmış Rauf Məmmədov yenidən meydana qayıdır, Eltaç Səfərliyə isə istirahət verilib. Birinci lövhədə əvvəlki kimi Şəhriyar Məmmədyarov oynayacaq – o, komandada bütün turlarda çıxış edən yeganə şahmatçıdır. Dördüncü lövhədə isə Məhəmməd Muradlı yer alacaq.
Bu arada qadınlardan ibarət Azərbaycan millisi Batumidə ilk məğlubiyyətini alıb – komandamız Almaniyaya 1,5:2,5 hesabı ilə uduzub. Yeganə məğlubiyyəti Gülnar Məmmədova yaşayıb, digər partiyalar isə heç-heçə başa çatıb.
Nəticədə Azərbaycan şahmatçı qadınları dördüncü yerdən yeddinci pilləyə eniblər. Onların aktivində beş xal var. Turnir cədvəlinə səkkiz xal toplayan Polşa və Almaniya yığmaları başçılıq edir.
Beşinci turda qadın komandamız da kişi yığmamız kimi yunanlarla qarşılaşacaq. Məğlubiyyətə baxmayaraq, Gülnar Məmmədova heyətdə yerini qoruyub. Lakin Xanım Balacayeva bu dəfə istirahət alacaq, onun əvəzinə Gövhər Beydullayeva çıxış edəcək. Birinci lövhədə dəyişiklik yoxdur – əvvəlki kimi Ülviyyə Fətəliyeva oynayacaq, dördüncü lövhədə isə Ayan Allahverdiyeva mübarizə aparacaq.
Teymur Tuşiyev
