Universiada-2027: İnnovasiya, Mədəniyyət və İdman Növlərinin Seçimi

2027-ci ildə Cənubi Koreyanın Çunqçonq şəhərində keçiriləcək Universiadanın təşkilatçıları innovativ oyunlar vəd edirlər.

İdman.biz-in Almaniyaya ezam olunmuş əməkdaşı xəbər verir ki, Universiada-2027-nin təqdimatı zamanı yarışlarda süni intellekt, 5G yayımı və qabaqcıl nəqliyyat idarəetmə sistemləri kimi müasir texnologiyalardan istifadə olunacağı bildirilib.

Bu sistemlər sayəsində tamaşaçılar stadionlara daha rahat yönləndiriləcək. Təşkilat Komitəsi bu yolla ənənə ilə innovasiyanı harmonik şəkildə birləşdirməyə çalışır.

Ekoloji davamlılıq da oyunların keçirilmə konsepsiyasının əsas sütunlarından biridir. Təşkilatçılar yeni tikintilər əvəzinə mövcud infrastrukturdan istifadə etməyə üstünlük verəcəklərini bildiriblər (hazırda yalnız tennis və gimnastika üçün iki yeni stadion inşa olunur). Eyni zamanda, ekoloji yerləşmə, tullantıların minimuma endirilməsi və təmiz qida məhsullarından istifadə ilə oyunların davamlı inkişafı təmin ediləcək.

Təşkilat Komitəsinin prezidenti Kan Çan Hi Çunqçonq regionunda multiformatlı tədbirin keçirilməsi planlarını təqdim edib.

Desentralizasiya konsepsiyasına uyğun olaraq, qonşu şəhərlər – Tecon, Secon, Çhunbuk və Çhunnam – birləşərək "Çunqçonq Metropolisi" adı altında vahid məkanda oyunlara ev sahibliyi edəcəklər.

Təşkilatçılar bildiriblər ki, oyunlar vasitəsilə dünyaya ənənə ilə idmanı birləşdirən "Koreya mədəniyyətinin yeni dalğasını" təqdim edəcəklər. Açılış və bağlanış mərasimlərində həm dünyada sevilən ənənəvi Koreya mədəniyyəti, həm də regional xüsusiyyətlər əks olunacaq.

Təşkilat Komitəsinin vitse-prezidenti Li Çan Sob deyir: "Çunqçonq Koreya yarımadasının mərkəzidir, buna görə həm Koreya, həm də yerli mədəniyyətə sahibik. Məsələn, bizim öz dialektimiz var və mədəniyyətimiz ölkənin digər bölgələrindən bir qədər fərqlidir".

O, həmçinin 2027-ci il Universiadasının proqramına daxil edilən üç əlavə idman növünün seçimi barədə danışıb: "Çimərlik voleyboluna gəlincə, oyunlarımızın keçiriləcəyi şəhərlərdən biri olan Boryeongdə məşhur palçıq festivalı təşkil olunur. Biz bu festivalı Universiada ilə birləşdirərək daha bayram əhvalı yaratmaq istəyirik.

Avarçəkmə üzrə artıq əla bazamız var və onu istifadə etməyi planlaşdırırıq. Qolf isə həm gənclər, həm də yaşlılar arasında populyardır. Bundan əlavə, bizim oyunçular bu idman növündə çox güclüdürlər və qızıl medal qazanacaqlarına inanırıq."

Zəki Feyzullaev, Essen (Almaniya)
İdman.biz