Report.az
Fransanın Şatoru şəhərində keçirilmiş atıcılıq üzrə Avropa çempionatında mübarizə aparmaq çətin olub.
Bu barədə "Report"a turnirdə gümüş medal qazanan Azərbaycan təmsilçisi Ruslan Lunyov açıqlama verib.
25 metr məsafəyə mərkəzi hədəfə atəş yarışında fəxri kürsünün ikinci pilləsinə qalxan 36 yaşlı idmançı əvvəlki qitə çempionatlarından da mükafatsız qayıtmadığını xatırladıb:
"2019-cu ildə qızıl, 2021-ci ildə bürünc, 2022 və 2024-cü ildə gümüş medal əldə etmişəm. Bu növ üzrə Avropa çempionatlarından nəticəsiz qayıtmıram. Bu dəfə mübarizə aparmaq bir az çətin idi. Açığı, daha yaxşı nəticə göstərə bilərdim. Sadəcə, əlimdə problem oldu. Ona görə sonuncu atışları yaxşı yerinə yetirə bilmədim".
Qeyd edək ki, Ruslan Lunyov yarışın 6 raundu üzrə ümumilikdə 583 xal və 26 daxili onluq (hədəfin mərkəzinə ən yaxın dəqiq atışlar) toplayıb. Bu nəticə ilə o, yalnız Ukrayna təmsilçisi Pavlo Korostylovdan geri qalıb. Hər iki idmançı eyni xal toplasa da, sonuncu seriyada göstərilən üstünlük qızıl medalın taleyini müəyyənləşdirib.
