Idman.biz
Almaniyanın Reyn-Rur bölgəsində keçiriləcək Ümumdünya Universiadasının başlamasına bir həftə qalır. Multiforumda 18 idman növündə 234 dəst medal uğrunda mübarizə gedəcək. Azərbaycan komandası da yarışlara hazırlığın son mərhələsinə qədəm qoyur.
İdman.biz iyulun 16-27-də keçiriləcək Universiada ilə bağlı maraqlı faktları təqdim edir.
Altı şəhər
Əsas yarışlar Reyn-Rur aqlomerasiyasının beş şəhərində olacaq: Boxum, Duysburq, Essen, Mülheim an der Ruhr və Hagen.
Onlara Berlin də qoşulacaq - ölkə paytaxtında üzgüçülük, suya tullanma və voleybol yarışları keçiriləcək.
Bunadək Universiada Almaniyada yalnız bir dəfə - 1989-cu ildə Duysburqda keçirilib.
Yarışların proqramı
Proqramda cüdo, atletika, basketbol, 3x3 basketbol, su polosu, üzgüçülük, suya tullanma, voleybol, çimərlik voleybolu, avarçəkmə, tennis, stolüstü tennis, badminton, idman gimnastikası, bədii gimnastika, kamandan oxatma, taekvondo və qılıncoynatma yer alıb.
İlk dəfə proqrama əlil arabalarında 3x3 basketbolu da daxil edilib - bu, Yay Universiadası tarixində ilk paralimpiya idman növüdür.
Tədbirin əhatə dairəsi
Universiadada təxminən 150-170 ölkədən 8500-dən çox idmançı və rəsmi şəxs iştirak edəcək.
Multiforumun açılışı iyulun 16-da Duysburqdakı "MSV Arena"da baş tutacaq. Bağlanış isə iyulun 27-də "Landschaftspark Duisburg Nord"da olacaq.
Yarışlar 23 idman obyektində keçiriləcək.
Təşkilatçılar dayanıqlı inkişafa xüsusi diqqət yetirirlər: yalnız mövcud və müvəqqəti obyektlər istifadə olunacaq, infrastruktur isə minimal dərəcədə dəyişəcək.
Eyni zamanda, Universiada mədəni-maarifləndirici proqramı da əhatə edəcək. Bu proqrama Beynəlxalq Universitet İdmanı Federasiyasının konfransı (17–19 iyul, Boxum), eləcə də yarışların keçirildiyi şəhərlərdə konsertlər və festivallar daxildir.
Azərbaycan komandasının heyəti
Universiadada Azərbaycanın bir sıra aparıcı idmançıları iştirak edəcək. Cüdo komandamız xüsusilə diqqəti çəkir. Heyətdə ötən ilin Avropa çempionu, dünya çempionatının bürünc mükafatçısı Elcan Hacıyev (90 kq) də yer alıb. O, öz çəki dərəcəsində əsas favoritlərdən biridir.
Qrup hərəkətləri yığmasını da qeyd edə bilərik. Gimnastlarımız Universiadada ilk dəfə qrup yarışlarında çıxış edəcəklər.
Azərbaycan həmçinin atletika, üzgüçülük, taekvondo və digər növlərdə də təmsil olunacaq.
Statistika nə deyir?
İki il əvvəl Çenqduda keçirilən Universiadada Azərbaycan doqquz medal - üç gümüş və altı bürünclə ümumi hesabda 38-ci yeri tutmuşdu. Bu mükafatlar cüdo, bədii gimnastika, avarçəkmə və taekvondoda əldə olunublar.
Ümumi hesabda Yay Universiadaları tarixində 41-ci yerdəyik. Bu müddət ərzində idmançılarımız 49 mükafat (13 qızıl, 14 gümüş, 22 bürünc) qazanıblar.
Zəki Feyzullayev
İdman.biz
