Idman.biz
Azərbaycan komandası bu gündən etibarən Almaniyanın Reyn-Rur bölgəsində start götürəcək Universiadaya uyğunlaşmağa başlayıb.
İdman.biz xəbər verir ki, bu idman tədbirinin keçirilməsi üçün Avropanın həm tarixi, həm də mədəni baxımdan maraqlı və dinamik bölgələrindən biri seçilib.
Reyn-Rur bölgəsi Qərbi Almaniyanın böyük bir hissəsini əhatə edir. Yarışları qəbul edən şəhərlər - Boxum, Duysburq, Essen, Mülheym və Hagen şəhərləri ilə yanaşı bura Şimali Reyn-Vestfaliya əyalətinin paytaxtı Düsseldorf da daxildir. Ən tanınmış şəhərlərdən biri Kölndür – əhalisi bir milyonu keçib və məşhur Köln kafedralı ilə tanınır. Digər məşhur şəhər isə "top" klubu "Borussiya" ilə tanınan Dortmunddur.
Universiada şəhərlərinin hamısı keçmiş Rur hövzəsinin bir hissəsində yerləşir. Bura Almaniyanın ən böyük şəhər aglomerasiyasıdır və əhalisi 5 milyondan çoxdur. Bu şəhərlər qərbdən şərqə doğru bir-birinə birləşmiş şəkildə yerləşir və qonaqlar bir şəhərin digərini əvəz etməsini, əsasən, yol nişanlarından anlayırlar. Region adını buradan axan Rur çayından alıb. Bu çay əvvəllər kömür və sənaye məhsullarının ucuz və səmərəli daşınmasına imkan verirdi.
Rur bölgəsi yüzilliklər boyu mədən sənayesinin təsiri altında inkişaf edib.
Hazırda region sənaye və ticarətin əsas mərkəzlərindən biri olsa da, onun inkişafına təkan verən əsas amil kömür hasilatı olub. XIX əsrdə zəngin kömür və filiz yataqları, polad istehsalı və emal sənayesi bu ərazini Avropanın ən böyük sənaye aglomerasiyalarından birinə çevirmişdi. Mədən sənayesi regionun həm iqtisadi, həm də mədəni simasını formalaşdırmış, yerli əhalinin düşüncə tərzinə təsir etmişdi. Artıq bu sahə fəaliyyətini dayandırsa da, şəhərlər bir vaxtlar ətrafında genişləndikləri zavod və mədənlərdən izini daşıyırlar. Sənaye inkişafı dövründə Rur bölgəsinə Almaniyanın digər yerlərindən və xarici ölkələrdən – xüsusilə Polşa, Türkiyə, İtaliya və Yunanıstandan – çoxlu insanlar köç etmişdi. Bu səbəbdən bu gün də bölgədə müxtəlif mədəniyyətlərin yanaşı yaşaması müşahidə olunur.
Essen şəhəri bölgədəki dəyişiklik və yeniliklərin simvolu sayılır. Burada bir zamanlar dünyanın ən böyük kömür mədəni olan Zollverein yerləşir. Hazırda bu obyekt UNESCO-nun Dünya İrs Siyahısına daxil edilib. Bu və digər sənaye obyektləri artıq mədəniyyət mərkəzləri, muzeylər və tədbir məkanlarına çevrilib.
Bu gün isə region elm, tədqiqat və universitet mərkəzi olub. Müxtəlif məlumatlara görə, burada doqquzdan çox universitet və texniki kolleclə yanaşı bir neçə texnologiya mərkəzi də fəaliyyət göstərir.
Universiadanın əsas yarışlarının keçiriləcəyi şəhər də məhz Essen olacaq və Azərbaycan komandası da burada yerləşib. İdmançılar bu gün ilk məşqlərinə başlayıblar və yaxın vaxtlarda yarışlara qoşulacaqlar.
İdman.biz
