Idman.biz
Azərbaycan idmançıları Almaniyanın Reyn-Rur bölgəsində keçirilən Universiadada çıxışa başlayırlar.
İdman.biz xəbər verir ki, bu gün bədii gimnastika, qılıncoynatma, badminton, stolüstü tennis, tennis və üzgüçülük üzrə yarışlar start götürür.
Bədii gimnastikada fərdi çoxnövçülükdə İlona Zeynalova və Kamilla Seyidzadə çıxış edəcək, qruplar arasında mütləq birincilikdə isə Ləman Əlimuradova, Güllü Ağalarzadə, Darya Sorokina, Kamilla Əliyeva və Yelizaveta Luzandan ibarət komandamız bacarığını nümayiş etdirəcək.
Badmintonda qarışıq komandalar arasında yarışlar keçiriləcək. Qrup mərhələsində Azərbaycan komandası Tailand və Avstraliya ilə qarşılaşacaq. Komandamızın heyətində Həcər Nuriyeva, Aqil Qabilov, Nigar Səmədova və Murad Şabanzadə yer alıblar.
Qılıncoynatmada idmançılarımız qrup mərhələsi qarşılaşmalarına çıxacaqlar. Qadınlar arasında şpaqa növündə Aynur Quliyeva, Nəzilə Rəhimova və Xədicə Həsənli, kişilər arasında sablya növündə isə Maqsud Hüseynli, Saleh Məmmədov və Murad Əkbərov mübarizə aparacaqlar.
Stolüstü tennis yarışlarında Xədicə Əbilzadə, Nigar Məhmudova, Səbinə Məmmədova və Zemfira Mikayılovadan ibarət qadın komandamız qrup mərhələsinin ilk oyununda Cənubi Koreya ilə qarşılaşacaq. Kişilərdən ibarət kollektivimiz (Amin Oruczadə, Nihad Səmədzadə, Tural Mirzəyev) isə ABŞ komandası ilə üz-üzə gələcək.
Tennis yarışlarında Elvin Həşimov zambiyalı Nakalanqa Hamayanqve ilə qarşılaşacaq.
Üzgüçülük proqramında Fətimə Əlkərəmova, Əbdürəhman Rüstəmov və Ramil Vəlizadə 50 metr məsafəyə batterflay üsulu ilə yarışda çıxış edəcəklər. Səid Həmidov isə 100 metr məsafəni arxası üstə üzəcək. Həmçinin kişilər arasında 4x100 metr sərbəst üsulla estafet yarışı da keçiriləcək.
İdman.biz
