Idman.biz
Yunan-Roma güləşi üzrə olimpiya mükafatçısı, dünya çempionu, Universiada və I Avropa Oyunlarının qalibi Rəsul Çunayevə vəzifə verilib.
İdman.Biz prosport.az-a istinadən xəbər verir ki, o, Azərbaycan Güləş Federasiyasında Nümayəndəliklərlə iş şöbəsinin mütəxəssisi vəzifəsinə təyin olunub.
Bu barədə 35 yaşlı veteran idmançı saytımıza açıqlama verib:
"Yanvarın 26-dan etibarən Güləş Federasiyasında Nümayəndəliklərlə iş şöbəsində fəaliyyətə başlamışam.
Bu məsuliyyətli və şərəfli vəzifəyə təyin olunmağımda göstərilən yüksək etimada görə Güləş Federasiyasının rəhbərliyinə dərin təşəkkürümü bildirirəm. Ölkəmizdə güləş idman növünün davamlı inkişafı, beynəlxalq arenada nüfuzunun daha da gücləndirilməsi istiqamətində üzərimə düşən vəzifələri məsuliyyətlə və vicdanla yerinə yetirəcəyəm".
O, işinin nədən ibarət olacağını da bildirib: "İşim bütün ölkə ərazisində uşaq və yeniyetmə güləşinin inkişafı ilə bağlı olacaq. Regionlarda Uşaq-Gənclər İdman Məktəbləri ilə əlaqəli fəaliyyət göstərmək və güləş klublarının işinə əməli kömək etmək üçün addımlar atacağam".
Qeyd edək ki, Güləş Federasiyası daha öncə də karyeralarını başa vuran veteran idmançılarını işlə təmin edib. Belə ki, Mariya Stadnik qadın, Hacı Əliyev sərbəst və Rafiq Hüseynov yunan-Roma güləşi üzrə kurator vəzifələrinə təyin olunub.
