Idman.biz
"Düşünürəm ki, bu qarşılaşma olduqca maraqlı olacaq. Çünki "Araz-Naxçıvan" artıq Avropa arenasında nəyə qadir olduğunu sübut edib".
İdman.biz xəbər verir ki, bu sözləri futbolinfo.az-a açıqlamasında "Araz-Naxçıvan"ın sabiq futbolçusu, Kiprdə legioner həyatı yaşamış İsmail Azzaui deyib.
O, Konfrans Liqasının 3-cü təsnifat mərhələsinin ilk görüşləri çərçivəsində bu gün baş tutacaq "Araz-Naxçıvan" – "Omonia" matçından danışıb: "Azərbaycan təmsilçisinin "Aris" üzərində qazandığı qələbə təsadüfi deyildi və indi bu uğuru "Omoniya"ya qarşı da davam etdirməlidirlər.
Son mövsümü Kiprin "Omonia29M" klubunda keçirən belçikalı vinger naxçıvanlıların "Aris"lə matçda hər kəsi təəccüləndirdiyini deyib: "Xüsusilə Yunanıstandakı oyunda hər kəsi təəccübləndirdilər. Çünki "Araz" həmin qarşılaşmanın favoriti hesab olunmurdu. Amma göstərdilər ki, nə qədər yaxşı komandadırlar və mərhələ adlamağa tam layiqdirlər. Fikrimcə, bu dəfəki rəqib "Omoniya" "Aris"dən daha zəifdir. Ən azı mən belə düşünürəm. Amma hər oyunun öz hekayəsi var və rəqiblər fərqlidir. Bu baxımdan qarşılaşmanı 50/50 hesab edirəm. "Araz" bu oyunda da eyni yanaşmanı sərgiləməlidir. "Aris"ə qarşı olduğu kimi səbirli olmalı və ön xətdə fərq yaratmağa çalışmalıdırlar. Bu şəkildə növbəti mərhələyə keçmək şansları yüksək ola bilər".
İdman.biz
