Idman.biz
Beynəlxalq Hokkey Federasiyası (IIHF) Rusiya yığmalarının beynəlxalq yarışlara qaytarılması ilə bağlı İdman Arbitraj Məhkəməsinin (CAS) qərarından şikayət edib.
İdman.Biz TSN telekanalına istinadən xəbər verir ki, IIHF şikayətində qərarı qəbul edən üç arbitrdən ikisinin Rusiya ilə əlaqələrini açıqlamadığını bildirib. Söhbət italiyalı Culio Palermodan və misirli İsmayıl Səlimdən gedir.
Məlumata görə, Palermo 2026-cı ilin sentyabrında Moskvada keçirilən arbitraj konfransında, Səlim isə 2025-ci ilin mayında Rusiyada hüquqşünasların iştirak etdiyi tədbirdə olub. Federasiya bu səfərlərin arbitr tərəfindən əvvəlcədən açıqlanmalı olduğunu düşünür.
Qeyd edək ki, oktyabrın 30-da CAS Rusiya Hokkey Federasiyasının müraciətini təmin edərək IIHF-yə Rusiya yığmalarının bir sıra beynəlxalq turnirlərdə iştirakına icazə verməyi tapşırıb. Qərar 2026/2027 mövsümündə keçiriləcək beş dünya çempionatına şamil olunur.
IIHF daha əvvəl də bu qərarla razılaşmadığını bildirmiş, onun təşkilati, təhlükəsizlik və logistika baxımından ciddi problemlər yaradacağını vurğulamışdı.
Bununla belə, CAS-ın yeni şikayətlə bağlı yekun qərarı hələ açıqlanmayıb.
