Lent.az
Paulo Bento etiraf edib ki, komanda idarəetmə məsələlərində güzəştə getməkdən imtina etməsi səbəbindən Kriştiano Ronaldo ilə münasibətləri pisləşib.
Lent.az-ın xarici mediaya istinadən xəbərinə görə, Portuqaliya millisinin keçmiş baş məşqçisi Paulo Bento milli komandada birlikdə olduğu müddətdə Kriştiano Ronaldo ilə çətin münasibətlərindən danışıb.
Bento 2010-cu ildən 2014-cü ilə qədər Portuqaliya milli komandasını çalışdırıb.
Mütəxəssisin sözlərinə görə, onun Ronaldo ilə münasibətləri zamanla əhəmiyyətli dərəcədə dəyişib.
"Əgər məndən münasibətlərimizin əvvəldəki kimi olub-olmadığını soruşsanız, xeyr, elə deyil", - Bento söyləyib.
Məşqçi komanda lideri ilə yaxşı münasibətləri qorumaq üçün öz prinsiplərindən imtina etmək niyyətində olmadığını vurğulayıb.
"Əgər münasibətlər naminə prinsiplərimdən imtina etməli olsam, yox. Məşqçilər qərar qəbul etmək üçün işə götürülürlər. Başqaları bizim üçün qərar verməyə başlayırsa, bu, işimizi görmədiyimiz deməkdir", - Bento qeyd edib.
Mütəxəssis həmçinin bildirib ki, komanda daxilində aydın bir iyerarxiya olmalıdır.
"Oyunçular soyunma otağında qərarları kimin verdiyini başa düşməlidirlər. Əgər bu anlayış yoxdursa, hər şey dağılmağa başlayır", - Portuqaliya millisinin keçmiş məşqçisi əlavə edib.
Kriştiano Ronaldo 2003-cü ildən bəri milli komandada oynayır və milli komandada ən çox oyun və qol vurma üzrə dünya futbol rekorduna sahibdir.
