Idman.biz
Braziliya millisinin və dünya futbolunun ulduzu Neymar ölkəsində öz şəxsi şəhərini qurmaq planını rəsmən təsdiqləyib.
İdman.Biz xəbər verir ki, futbolçu bu barədə verdiyi müsahibədə danışıb.
"Mən Səudiyyə Ərəbistanı üçün darıxıram - oradakı həyat səviyyəsi, restoranlar və ümumilikdə hər şey üçün. Braziliyada ağıllı şəhər tikintisi üzərində işləyirəm. Həmçinin Səudiyyə Ərəbistanında da birini yaratmaq niyyətindəyəm. Onu öz adımla adlandıracağam", - deyə Neymar bildirib.
CPG nəşrinin məlumatına görə, layihənin tikintisinə artıq start verilib və proses futbolçunun atasına məxsus şirkət tərəfindən həyata keçirilir.
Nəhəng kurort şəhər Atlantik okeanı sahili boyunca 100 kilometr ərazini əhatə edəcək. Layihə Braziliyanın şimal-şərqində yerləşən Alaqoas və Pernambuku ştatlarını əhatə edəcək.
Layihə çərçivəsində 28 lüks yaşayış kompleksi, otellər və idman kompleksləri, çimərliklər və elit istirahət zonaları tikiləcək.
Layihənin ümumi dəyəri təxminən 1,43 milyard ABŞ dolları (təxminən 2,43 milyard AZN) təşkil edir. Planlara əsasən bütün tikinti işləri 2037-ci ilə qədər tamamlanmalıdır.
Beləliklə, Neymar təkcə futbol meydanında yox, urbanistika sahəsində də iddialı layihəyə imza atmağa hazırlaşır.
