"Kruzeyro" – "Atletiko Mineyro" oyununda rekord sayda qırmızı vərəqə, kütləvi dava və Halkın üzrxahlığı

Braziliyadada baş tutan "Kruzeyro" – "Atletiko Mineyro" finalı böyük qalmaqalla yadda qalıb.

İdman.Biz xəbər verir ki, qarşılaşmadan sonra baş hakim Mateus Kandanşan protokolda ümumilikdə 23 birbaşa qırmızı vərəqə göstərildiyini qeyd edib. Bu göstərici Braziliya futbolu tarixində rekord hesab olunur.

Qarşıdurma əlavə vaxtın son saniyələrində, "Kruzeyro"nun 1:0 hesabı ilə öndə olduğu anda baş verib. Matçın yeganə qolunu 59-cu dəqiqədə Kaio Jorje vurub.

Gərginliyə "Atletiko Mineyro"nun qapıçısı Eversonun cərimə meydançasında "Kruzeyro"nun yarımmüdafiəçisi Kristian Alveşlə toqquşmadan sonra rəqibini yerə yıxaraq dizlə üzünə zərbə endirməsi səbəb olub. Bundan sonra hər iki komandanın futbolçuları, ehtiyat oyunçular və məşqçi heyəti arasında kütləvi dava baş verib.

Öz növbəsində "Atletiko Mineyro"nun hücumçusu Halk "Kruzeyro" ilə oyunda baş verən kütləvi dava ilə bağlı azarkeşlərdən üzr istəyib.

Braziliyalı futbolçu qarşıdurma zamanı rəqibini arxadan vurduğunu etiraf edərək davranışına görə peşman olduğunu bildirib.

"Belə zorakılıq səhnələrini görmək çox üzücüdür. Biz bunu uşaqlara, yeniyetmələrə və futbolu həqiqətən sevən insanlara göstərməməliyik", – deyə Halk bildirib.

12:30

Futbol üzrə Braziliyada çempionatında keçirilən "Kruzeyro" – "Atletiko Mineyro" derbisi meydandakı gərginliklə diqqət mərkəzinə düşüb.

İdman.Biz xəbər verir ki, qarşılaşma zamanı hər iki komandanın futbolçuları arasında ciddi mübahisə yaranıb. Mübahisə zamanı "Atletiko Mineyro"nun ulduz futbolçusu Halk rəqib komandanın oyunçusu Romeronun başına yumruq zərbəsi endirib. Bu hadisə meydanda gərginliyin daha da artmasına səbəb olub.

Futbolçular arasında qısa müddətli kütləvi qarşıdurma yaşanıb. Komanda yoldaşları və matçın rəsmi şəxsləri müdaxilə edərək tərəfləri sakitləşdirməyə çalışıblar.