Sport24.az
Türkiyə Hərbi Hava Qüvvələri generalı Mete Kuş futbol matçı zamanı stadionun üzərindən qırıcı təyyarələrin uçması nəticəsində komandanlıqdan azad edilib. Sport24.az xəbər verir ki, hadisə aprelin 21-də Konyada, "Konyaspor" və "Fənərbaxça" arasında keçirilən Türkiyə Kubokunun dörddəbir final matçı zamanı (səfərdə 1-0) baş verib.
"Turkish Minute"nin məlumatına görə, F-16 qırıcı təyyarələri və helikopterləri arenanın üzərindən uçaraq yüksək səs-küy yaradıb ki, bu hətta canlı yayımda belə aydın eşidilib. General Kuş "Konyaspor" azarkeşi olduğundan, uçuşun kluba dəstək jesti kimi qiymətləndirildiyi bildirilir.
Hadisədən sonra Türkiyə Hərbi Hava Qüvvələri komandanlığı Mete Kuşu vəzifəsindən kənarlaşdırıb və onu Ankaradakı qərargaha qaytarıb. Hakimiyyət orqanları hadisənin səbəbləri ilə bağlı araşdırmaya başlayıb.
