Oxu.az
Bolqarıstan çempionatında mümkün danışılmış oyunlarla bağlı səs-küylü qalmaqal yaranıb.
Oxu.Az "Voxnews"a istinadən xəbər verir ki, hadisə 27-ci turun ÇSKA (Sofiya) - "Lokomotiv Sofiya" matçından (1:0) yaşanıb.
Yayım kameraları izləyicilər arasında hiddət dalğasına səbəb olan anı lentə alıb. Ənənəyə görə, start fitindən əvvəl yayım bir neçə saniyəlik VAR otağına keçirilib və burada azarkeşlərin diqqətini hakimlərin işi deyil, texniki heyətdən birinin hərəkəti cəlb edib. Videoassistentlərə xidmət göstərən operator öz smartfonunda mərc saytını gəzərkən görüntülənib. Kadrlarda VAR-ın hakimləri Volen Çinkov və Stoyan Arsovun monitorlarda işlədiyi, onların həmkarının isə əlində məşhur mərc platformasının açıq səhifəsi olan telefonu olduğu görünür. O, kadrda olduğunu anlayanda özünü itirib. Səhvini anlayan operator dərhal telefonu gizlədib.
Video dərhal sosial şəbəkələrdə yayılaraq tənqid atəşinə tutulub. Azarkeşlər mümkün saxtakarlıqdan şübhələnib və hakimliyin obyektivliyindən şikayətləniblər.
Qeyd edək ki, Bolqarıstan Futbol Federasiyasının rəsmiləri isə həmin hakimi cəzalandıracaqlarını bildiriblər.
