Oxu.az
Avropa Futbol Assosiasiyaları İttifaqının (UEFA) rəhbəri Aleksander Çeferin rezonans doğuran bəyanatla çıxış edib. Onun sözlərinə görə, UEFA siyasi və ya maliyyə mənfəətləri naminə təşkilatı bölməyə çalışan qüvvələrlə üzləşir, onlar "parçala və hökmranlıq et" taktikasından istifadə edirlər.
Oxu.Az-ın TASS-a istinadən verdiyi məlumata görə, o, bu barədə təşkilatın 49-cu konqresində bəyan edib.
"Biz dünyada baş verən çoxsaylı hadisələri - mürəkkəb, çox vaxt bir-birinə zidd olan və fundamental dəyərlərdən məhrum olan hadisələri görməməzlikdən gələ bilmərik. Lakin UEFA bir təşkilat olaraq ədalət, şəffaflıq və söz azadlığını dəstəkləyir. Biz bu məsələləri harada və necə olursa olsun, bizə və işimizə təsir etdikdə, aktiv, qətiyyətli və birlikdə həll edəcəyik", - deyə təşkilat rəhbəri qeyd edib.
Onun sözlərinə görə, bu gün hər tərəfdən "biz onlara qarşı" deyiminin səslənməsi dərin bir parçalanma illüziyası yaradır. Lakin onun fikrincə, bu, insanları və bütöv ölkələri öz eqoist məqsədləri naminə bir-birinə qarşı qoymağa çalışanların məqsədyönlü taktikasıdır.
"Onlar qəsdən bizi bölməyə çalışırlar - fərdlər kimi, vətəndaşlar kimi, həm milli, həm də bütöv qitələr səviyyəsində, həmçinin uğurlu və nüfuzlu bir təşkilat kimi bizim daxilimizdə... Çox vaxt siyasi və ya maliyyə mənfəəti naminə, ya sadəcə riyakarlıq və vicdansızlıq səbəbindən. Amma sonda bütün bu metodlar yalnız öz eqoist məqsədlərinə çatmağa gətirib çıxarır. Onların istifadə etdiyi "parçala və hökmranlıq et" mirası, qütbləşmə, münaqişə və kleptokratiya imperiya qalığıdır", - deyə Çeferin bildirib.
