Oxu.az
"Hidayət Heydərov və Zelim Kotsoyev yaxşı formadadır".
Oxu.Az xəbər verir ki, bunu jurnalistlərə müsahibəsində kişi cüdoçulardan ibarət Azərbaycan millisinin baş məşqçisi Riçard Trautman deyib.
Almaniyalı mütəxəssis Monteneqronun paytaxtı Podqoritsada keçiriləcək Avropa çempionatı ilə bağlı fikirlərini bölüşüb:
"Yaponiyada çox yaxşı təlim-məşq toplanışı keçmişik. Son hazırlıqları Bakıda görürük. Olimpiya çempionlarımız da bu turnirə qatılacaqlar. Onların uzun müddətdən sonra ilk sınaqları olacaq. Hər ikisi yaxşı formadadır. Yarışa bir neçə həftə var. Öncədən nəsə demək mümkün deyil. Cüdonu digər idman növlərindən fərqləndirən də məhz budur ki, əvvəlcədən proqnoz vermək mümkün deyil. Olimpiya çempionu olmuş idmançı belə ilk 10 saniyədə məğlub ola bilər. Turnirdən öncə ciddi zədəsi olan idmançı yoxdur. Avropa və dünya çempionatında ən yaxşı nəticəni qazanmağı planlaşdırırıq", - baş məşqçi deyib.
Qeyd edək ki, Avropa çempionatı aprelin 23-dən 27-dək təşkil olunacaq.
Anar Həsənov
