Idman.biz
İtaliyada isveçrəli azarkeşin başına gələn qeyri-adi hadisə mətbuatın diqqətinə səbəb olub.
İdman.Biz "Myach Production" "Telegram" kanalına istinadən xəbər verir ki, 2004 -cü ildə "Bazel" klubunun azarkeşi Rolff Bantle səfərdə sevimli komandasına dəstək olmaq üçün Milana yollanıb.
Baş tutan "İnter" - "Bazel" görüşdən(4:1) sonra o, "San Siro" stadionunda tualetə gedib, lakin daha sonra çıxış yolunu tapa bilməyib. Komandanın avtobusu onu gözləmədən yola düşüb.
R. Bantlenin üzərində cəmi 20 avro və 15 İsveçrə frankı olub. Telefonu və sənədləri isə yanında olmayıb. Nəticədə o, İsveçrəyə qayıda bilməyib və İtaliyada qalmağa məcbur olub.
İlk həftələrdə o, yatmaq üçün yuxu torbasından istifadə edib və yerli tələbələrin köməyi ilə qidalanıb. Daha sonra Milanın Badjo rayonunda məskunlaşıb, tikintilərdə işləyib və ictimai duşxanalardan istifadə edib. İsveçrədə isə onu itkin düşmüş şəxs kimi axtarıblar. Lakin Rolff sonradan bildirib ki, "azadlığın dadını çıxardığı üçün" vətənə qayıtmaq istəməyib.
Onun hekayəsi təsadüf nəticəsində başa çatıb. 10 il sonra Rolff yıxılaraq bud sümüyünü sındırıb və xəstəxanaya düşüb. Müalicə zamanı məlum olub ki, onun nə sığortası, nə də İtaliya vətəndaşlığı var. Həkimlər İsveçrə konsulluğuna müraciət ediblər. Bundan sonra azarkeş vətəninə qaytarılıb və Bazeldə qocalar evinə yerləşdirilib.
