Günel Bədəlova: Azərbaycanda qış idman növlərinin inkişafında əhəmiyyətli irəliləyişlər əldə olunub

Son bir neçə ildə Azərbaycanda qış idman növlərinin inkişafında nəzərəçarpacaq uğurlar əldə olunub.

İdman.biz media.az-a istinadən xəbər verir ki, bunu Azərbaycan Qış İdman Növləri Federasiyasının baş katibi Günel Bədəlova Türkdilli Dövlətlərin Xizək Kurortları İttifaqının I Zirvə Toplantısı çərçivəsində "Türkdilli dövlətlərin dağ kurortlarında qış idman növlərinin inkişafı və gələcək perspektivlər" mövzusunda panel iclasında deyib.

"Azərbaycanın ilk dəfə Xizək Alpinizmi üzrə Dünya Kubokuna ev sahibliyi etmək hüququnu əldə etməsi gələcək uğurlardan sadəcə biridir. Qış İdmanı Federasiyası təkcə qış idman növlərini təbliğ etmək deyil, həm də infrastrukturu inkişaf etdirmək, idmançıları dəstəkləmək və bu növlərə ictimai marağı artırmaq məqsədi ilə yaradılmışdır. Bizim rolumuz istedadı istiqamətləndirmək, həvəsləndirmək və dəstəkləmək, davamlı tərəqqi və qlobal inkişaf üçün şərait yaratmaqdır. 2022-ci ilin oktyabrında Beynəlxalq Xizək Alpinizm Federasiyasına daxil olduqdan sonra mühüm irəliləyiş əldə etdik. Həmin il biz uşaqlar və böyüklər idmançılarından ibarət xizək alpinizmi üzrə milli komanda yaratdıq", - Bədəlova bildirib.

Qeyd edək ki, xizək alpinizmi üzrə dünya çempionatının 2027-ci il fevralın 28-dən martın 7-dək "Şahdağ" Turizm Mərkəzində keçirilməsi nəzərdə tutulur. Həmçinin 2026-cı ildə xizək alpinizmi üzrə Avropa çempionatı və Dünya Kuboku yarışları da təşkil olunacaq. Avropa çempionatının 2026-cı il martın 4-8-də, Dünya Kubokunun isə martın 6-8-də keçirilməsi planlaşdırılır.

İdman.biz