Oxu.az
İtaliyanın "Roma" futbol klubunun müdafiəçisi, almaniyalı Mats Hummels mövsümün sonunda karyerasını bitirəcəyini açıqlayıb.
Oxu.Az xəbər verir ki, futbolçu bunu "X" sosial şəbəkəsində bildirib.
"Bu anda emosiyalarımla mübarizə aparıram. Hər futbolçunun qarşılaşacağı an gəlir. Futbolda 18 il keçirdikdən və bu idman növünün mənə verdiyi hər şeydən sonra karyeramı bitirirəm. Qələbə matçlarının videolarını gördükdə başa düşürəm ki, bu səyahət, bütün bu yol mənim üçün çox şey deməkdir. Yaşadıqlarımın nə qədər fövqəladə olduğunu anlayıram", - deyə Hummels hislərini ifadə edib.
36 yaşlı Hummels 2024-cü ilin yayında Dortmunt "Borussiya"sından "Roma"ya transfer olub. Bu mövsüm müdafiəçi 18 oyun keçirib və 1 qol vurub.
2016-2019-cu illərdə "Bavariya"da oynayan futbolçu Münhen klubunun yetirməsidir. Hummels Almaniya çempionatı və Superkubokunda 6 dəfə, ölkə kubokunda isə 3 dəfə qalib olub. O, Almaniya milli komandasının heyətində 78 oyun keçirib və 5 qol vurub, 2014-cü ildə Braziliyada keçirilən dünya çempionatının qalibi olub.
