Idman.biz
"Çempionata yüksək səviyyədə hazırlaşmışdıq".
Bunu İdman.biz-ə çövkən üzrə Azərbaycan millisinin üzvü Elçin Camallı deyib.
Kapitan Polşada keçirilən Avropa çempionatında komandanın çıxışını dəyərləndirib. O bildirib ki, mübarizə gərgin və maraqlı keçib: "Azərbaycandan kənarda iştirak etdiyimiz ilk rəsmi Avropa çempionatı idi. Yarışda altı komanda iştirak edirdi. Bütün oyunlar gərgin mübarizə şəraitində keçsə də, finalda Malta ilə oyunu xüsusilə fərqləndirərdim. Həlledici qarşılaşma son oyun olduğu üçün hər kəs bütün gücünü qoyub qalib gəlmək istəyir. Rəqib çox hazırlıqlı gəlmişdi. Buna baxmayaraq, qalib tərəf biz olduq".
Camallı ölkədaxili yarışların davamlı olaraq keçirilməsinin milli komandanın uğurlarında mühüm rol oynadığını qeyd edib: "Komandada əhval-ruhiyyə yaxşı idi. Ölkədə peşəkar liqada hər həftə yarışlarımız olduğuna görə, klublardakı ən güclü idmançıları toplaya bilmişdik. Ümumiyyətlə, ölkədə keçirilən çövkən yarışları bizim çıxışımıza müsbət mənada çox təsir etdi. Hazırda daxili çempionat davam edir. Sentyabrda polo üzrə Avropa çempionatı gözlənilir. Bu yaxınlarda bir sıra beynəlxalq yarışlarda da iştirak etməyi planlayırıq. Hədəflərimiz yüksəkdir".
Qeyd edək ki, Avropa çempionatında 6 ölkə - Azərbaycan, Türkiyə, Macarıstan, Malta, Polşa və Böyük Britaniya iştirak edib. Final oyununda yığmamız Maltaya 6:2 hesabı ilə qalib gəlib. Tarixi nəticə ilə yadda qalan Azərbaycan millisi ilk dəfə Avropa çempionu olub.
Aytac Sahəd
İdman.biz
