"EAS Simurgh" yeniyetmələr arasında çimərlik reqbisi üzrə ilk ölkə birinciliyinin qalibi olub

"Aquatic Palace"da yeniyetmələr arasında çimərlik reqbisi üzrə ilk ölkə birinciliyi keçirilib.

İdman.biz xəbər verir ki, Azərbaycan Respublikası Gənclər və İdman Nazirliyi, Azərbaycan Reqbi Federasiyası və "Konfrans Services" şirkətinin təşkilatçılığı ilə baş tutan yarışda "Qarabağ", "Şamaxı OM", "EAS Simurgh" və "Dunya Warriors" klubları iştirak ediblər.

Oyunlar qızğın və prinsipial şəraitdə keçsə də, yeniyetmə reqbiçilər bu idman növünün əsas prinsiplərindən biri olan centlmensayağı mübarizə aparmaqla arenaya toplaşmış tamaşaçılara xoş anlar yaşadıblar.

İlk ölkə birinciliyinin qalibi Avropa Azərbaycan Məktəbi nəzdində yenicə yaradılmış "EAS Simurgh" reqbi klubu olub. Finalda onlar artıq prinsipial rəqiblərinə çevrilmiş "Qarabağ" reqbiçilərinə qalib gəliblər. Son saniyələrdə Brodi Riddelin uğurlu cəhdi komandasına qızıl medalları və kuboku qazandırıb.

3-cü yer uğrunda görüşdə isə "Dünya Məktəbi"nin nəzdində fəaliyyət göstərən "Dunya Warriors" klubu və Şamaxı Olimpiya Mərkəzinin komandası əsl döyüş nümayiş etdiriblər. Son saniyələrdə Bakı təmsilçiləri İbrahim Əlizadənin cəhdi ilə məğlubiyyətdən qaça biliblər və nəticədə qalib "qızıl xal" prinsipi ilə müəyyənləşməli olub. Burada "cəngavərlər" daha uğurlu olublar və bürünc medalları qazanıblar.

Ölkə birinciliyinin ən yaxşı oyunçusu adina isə "Şamaxı OM" və U-12 milli komandamızın üzvü İsmayıl Salmanov layiq görülüb və xüsusi hədiyyə olaraq reqbi topu qazanıb.

İdman.biz