Report.az
Dünya Futvolley Federasiyasının (Footvolley Worldwide) I Baş Assambleyası Bakıda işə başlayıb.
"Report"un məlumatına görə, tədbirdə Beynəlxalq Futvolley Federasiyasının, Azərbaycan Futnet Federasiyasının prezidenti Vüsal Xəlilov, hər iki qurumun baş katibi Əfqan Həmzəyev, Pakistan, Hindistan, İran, Moldova, Türkiyə, Rusiya, Qırğızıstan, Qazaxıstan və Birləşmiş Ərəb Əmirliklərindən olan nümayəndələr iştirak ediblər.
İlk olaraq Azərbaycan Respublikasının Dövlət Himni səsləndirilib.
Qonaqları salamlayan Vüsal Xəlilov Baş Assambleyada bir sıra məsələlərə toxunacaqlarını söyləyib: "Ümid edirəm ki, bu idman növünün inkişafında sizin dəstəyinizi görəcəyik. Hər biriniz ölkənizdə bu sahə üçün çalışırsınız".
Ardınca iştirakçı ölkələrin nümayəndələri fikirlərini bölüşüblər, tədbirə qatıldıqları üçün şad olduqlarını bildiriblər. Onlar qarşıdakı hədəflər haqqında da məlumat veriblər.
Baş Assambleya zamanı qurumun il ərzində gördüyü işlər, maliyyə hesabatı, təqvim ilindəki hədəflər barədə məlumat veriləcək, yeni üzvlərin müraciətinə baxılacaq, İcraiyyə Komitəsinə və digər strukturlara seçkilər keçiriləcək.
Qeyd edək ki, Baş Assambleya ilk dəfə olaraq keçirilir və hər 5 ildən bir təşkili nəzərdə tutulur.
