Idman.biz
"Şaquli qaçışın öz ulduzları var və "Alov Qüllələri"ndə yarış böyük maraq doğuracaq".
Bunu İdman.biz-ə açıqlamasında Bakıda səfərdə olan Dünya Şaquli Qaçış Assosiasiyasının (TWA) prezidenti Daniel Cecetka deyib.
O, Azərbaycana səfəri çoxdan planlaşdırdığını bildirib: "Nəhayət, mən Bakıya gəlib bir çox maraqlı layihələri müzakirə edə bildim. Gənclər və idman naziri Fərid Qayıbov, "Triterra" klubunun təsisçisi Rüfət Həsənovla söhbət, birgə layihələri müzakirə etmək maraqlı oldu. Biz rəsmi olaraq elan edə bilərik ki, "Flame Towers" sentyabrın 27-də şaquli qaçış turnirinə ev sahibliyi edəcək".
TWA prezidentinin sözlərinə görə, bu tirnir çoxsaylı idman həvəskarlarını cəlb edəcək: "Azərbaycan - yeni yer və yeni yarış. Bura gəlmək, Bakı və "Alov Qüllələri"ni görmək imkanı maraq doğurur. Düşünürəm ki, turnirdə yüzlərlə şaquli qaçış ustası iştirak edə bilər, onlar üçün bu, yeni çağırış olacaq".
O əlavə edib ki, şaquli qaçışın öz pərəstişkarları və ulduzları var: "Bizim təqvimimizdə hündürmərtəbəli binalarda qaçmaqdan daha çoxunu əhatə edən çoxlu tədbirlər, reytinq var. Yaponiya, Avstraliya, İndoneziya və bir çox başqa ölkələrdən öz ulduzlarımız var. Eyni zamanda, təqvimi genişləndirmək, yeni yerlər axtarmaq üzərində işləyirik. Daimi prosesdəyik".
Cecetka Azərbaycanda şaquli qaçışdan danışaraq "Triterra" klubunun üç il ardıcıl olaraq "Çinar Plaza" biznes mərkəzində keçirdiyi yarışı xatırladıb: "Biz təkcə böyük tədbirləri deyil, həm də qısa tarixə malik, lakin populyarlıq qazanan hadisələri də izləyirik. Bu mənada ideyanı həyata keçirən "Triterra"nın nümunəsi göstəricidir. Düşünürəm ki, qarşıda bir sıra birgə layihələrimiz olacaq".
Qrum rəsmisi yaxın vaxtlarda yenidən Bakıya səfər edəcəyini vurğulaytıb: "Sabah gedirəm, amma sentyabrda mütləq "Flame Towers" turnirinə gələcəm. Aktiv şəkildə şaquli qaçışla məşğul olmağa çalışıram. Lakin təşkilatın prezidenti kimi bu, əlavə məsuliyyətdir. Bundan əlavə, hər bir yarış ciddi hazırlıq tələb edir. Azərbaycanda gördüklərim ən xoş təəssürat yaratdı. Bakıda yenidən görüşənədək".
Qeyd edək ki, bu gün gənclər və idman naziri Fərid Qayıbov TWA prezidenti Daniel Cecetkanı qəbul edib.
Zəki Feyzullayev
İdman.biz
