Idman.biz
2026-cı il 24-28 may tarixlərində Bakıda təşkil olunacaq "SportAccord" Dünya İdman və Biznes Sammiti üçün nümayəndə heyətlərinin qeydiyyatına start verilib.
İdman.Biz xəbər verir ki, bu barədə Bakı Şəhər Halqası Əməliyyat Şirkəti məlumat yayıb.
Eyni zamanda 120-dən çox beynəlxalq federasiyanı birləşdirən "SportAccord" təşkilatı da rəsmi açıqlama ilə çıxış edib.
Bildirilib ki, Bakıda keçiriləcək Konvensiyada beynəlxalq federasiya rəhbərləri, Beynəlxalq Olimpiya Komitəsinin nümayəndələri və idman sahəsində tanınmış ekspertlər iştirak edəcəklər.
Azərbaycanın gənclər və idman naziri Fərid Qayıbov ölkəmizin sammitə ev sahibliyi etməsini yüksək qiymətləndirib:
"Ölkəmizin "SportAccord Convention" tədbirinə ev sahibliyi etməsi Azərbaycan Prezidenti İlham Əliyevin rəhbərliyi altında həyata keçirilən uğurlu idman siyasətinin göstəricisidir. Azərbaycan dünya idmanının aparıcı nümayəndələrini qəbul etməyə və səmərəli dialoq, əməkdaşlıq üçün ideal şərait yaratmağa hazırdır. Əminik ki, bu tədbir idmanın inkişafına mühüm töhfə verəcək".
"SportAccord" təşkilatı nümayəndə heyətlərinin qeydiyyatının artıq rəsmi platformada aktiv olduğunu təsdiqləyib və iştirakçılara yerini vaxtında təmin etmək üçün erkən qeydiyyatdan keçməyi tövsiyə edib.
