Idman.biz
Biz demək olar ki, domino oyununu hər yerdə oynayırıq – evdə, bağda, küçədə. Lakin az adam bilir ki, bu oyuna hətta dünya çempionatları da keçirilir. Üstəlik, yerli domino həvəskarları bu yarışlarda uğurla iştirak edirlər.
İdman.Biz "Bakı" Domino Klubunun sədri Bərat Abdullayevdən müsahibə alıb.
– Bərat müəllim, sizi necə təqdim edək - "Bakı" Domino Klubunun rəhbəri kimi, yoxsa Domino Federasiyasının prezidenti kimi?
– Uzun müddət Azərbaycan Domino Federasiyasının prezidenti olmuşam. Lakin Gənclər və İdman Nazirliyi bütün stolüstü oyunları bir struktura - Stolüstü Oyunlar Federasiyasına birləşdirməyə qərar verdi. Düşünürəm ki, bu federasiya hələ yaradılmayıb. Ona görə də bizi "Bakı" Domino Klubu ilə məhdudlaşdıraq - biz həmişə qanun çərçivəsində fəaliyyət göstərmişik.
– Klubun domino ustaları beynəlxalq turnirlərdə iştirak edirlər? Son vaxtlar onlardan xəbər yoxdur…
– Düz deyirsiniz. Son böyük uğurumuz 2009-cu ildə Dominikan Respublikasında keçirilən dünya çempionatında oldu. Rəhman Ələkərov və Mehman Məmmədov cütlükdə gümüş medallar qazandılar.
Dünya çempionatları əsasən Mərkəzi və Cənubi Amerikada keçirildiyi üçün komandamızı bu yarışlara göndərmək üçün maliyyə imkanımız çox vaxt çatmırdı. Buna baxmayaraq, sonrakı illərdə Meksika və Kubada keçirilən dünya çempionatlarında da iştirak etmişik.
– Niyə bu işdə nazirlikdən dəstək istəmirsiniz?
– Bizim bunun üçün səlahiyyətimiz yoxdur - hazırda klub kimi fəaliyyət göstəririk, federasiya kimi yox. Lakin ümid edirəm ki, Stolüstü Oyunlar Federasiyası yaradıldıqdan sonra vəziyyət dəyişəcək. Hazırda isə ölkə çempionatları və iki ənənəvi illik turnir - "Zəfər Kuboku" (bu il 8 noyabrda beşinci dəfə keçiriləcək) və "Bərat Kuboku" təşkil edirik.
– Turniri öz adınıza qoymusunuz?
– Təkcə turniri adımla adlandırmadım, həm də ilk yarışda qalib gəldim (gülür). İlk "Bərat Kuboku"na 24 dominoçu qatılmışdı. Bu qalibiyyətlə mən yarışın əhəmiyyətini göstərmək istədim - yəni qalib olmaq istəyirsinizsə, mənim qədər yaxşı oynamalısınız.
Əlavə edim ki, "dominoçu" sözü gündəlik dilimizə möhkəm daxil olub. Artıq heç kim "domino oynayan" demir, hamı "dominoçu" deyir - futbolçu, basketbolçu, ağırlıqqaldıran kimi.
– Beynəlxalq domino ilə bizim ənənəvi "101" oyunu arasında nə fərq var?
– Çox fərqləri var! Birincisi, beynəlxalq oyunda oyun 200 xaladək davam edir. İkincisi, oyun bitəndə rəqibin əlində qalan "boş" daş heç bir xal gətirmir. Bizdəki 10 xalı kim kəşf edib, bilmirəm - amma bu tamamilə məntiqsizdir. Niyə məhz 10, niyə 50 yoxsa 90 deyil? (gülür)
Bundan başqa, beynəlxalq domino oyununda hər qalib olan cütlüyün ardınca növbə ilə oyun başlayır, bizim kimi əvvəlki qalib hər dəfə birinci deyil. Həmçinin, ilk partiyaya "bir qoşa" çıxanlar yox, ən çox xal olan daşı çəkənlər başlayır.
Vüqar Vüqarlı
