Azərbaycan və Türkiyə arasında gənclər və idman sahələrində əməkdaşlıq üzrə protokol imzalanıb

İyunun 18-19-da Türkiyə Respublikasının Gənclər və İdman Nazirliyinin nümayəndə heyəti Azərbaycanda səfərdə olub.

İdman.biz xəbər verir ki, səfərin ilk günündə ADA Universitetində Azərbaycan ilə Türkiyə arasında gənclər və idman sahələrində əməkdaşlığa dair İşçi Qrupunun 3-cü iclası keçirilib.

Tədbirdə hər iki ölkənin Gənclər və İdman Nazirliklərini təmsil edən nümayəndələr, o cümlədən nazir müavinləri, aidiyyəti struktur bölmələrin rəhbərləri iştirak ediblər.

İclas zamanı tərəflər gənclər və idman siyasəti, qeyri-formal təhsil, mübadilə proqramları, eləcə də birgə layihələr və fəaliyyətlər barəsində fikir mübadiləsi aparıblar. Hər iki tərəf əvvəlki görüşlərdə əldə olunan razılaşmaların icra vəziyyətini müzakirə edib və gələcək fəaliyyət istiqamətlərini müəyyənləşdiriblər. İclasda Türkiyə və Azərbaycan nümayəndələri təqdimatlarla çıxış edərək əməkdaşlıq üzrə yeni təkliflər irəli sürüblər.

İyunun 19-da iki ölkənin nazir müavinləri Fərhad Hacıyev və Enes Eminoğlu arasında görüş keçirilib. Görüşdə əməkdaşlığın daha da dərinləşdirilməsinin vacibliyi vurğulanıb və növbəti iclasın Türkiyədə keçirilməsi barədə razılıq əldə olunub. Tədbirin sonunda növbəti bir il ərzində ölkələrimiz arasında gənclər və idman sahələrində müxtəlif layihələrin həyata keçirilməsini nəzərdə tutan protokol imzalanıb.

Səfər çərçivəsində Türkiyə nümayəndə heyəti Bakı şəhərinin tarixi məkanları ilə tanış olub və bir sıra tədbirlərdə iştirak edib.

İdman.biz