Oxu.az
"İdmançıların bəziləri olimpiadadan sonra istirahət etdilər. Aralarında zədələrini sağaldanlar var. Ümid edirəm ki, Avropa çempionatından yaxşı nəticə ilə dönəcəyik".
Oxu.Az xəbər verir ki, bunu jurnalistlərə müsahibəsində kişi cüdoçulardan ibarət Azərbaycan millisinin baş məşqçisi Riçard Trautman deyib.
"Ən azı iki qızıl medal hədəfləyirik. Bu, üç və ya dörd də ola bilər. Avropa çempionatına qitənin ən yaxşıları gələcəklər. Rusiyanın, Gürcüstanın və Fransanın da belə idmançıları var. Hər bir idmançını fərdi olaraq hazırlayırıq. Elcan Hacıyev gənc idmançıdır. Zədəsini yeni sağaldıb. O vaxt Avropa çempionu olması sürpriz deyildi. Bu dəfə Turan Bayramovdan və Ruslan Paşayevdən də qızıl medal gözləyirəm. Sürpriz edə bilərlər. Amma çətin olacağını bilirəm", - deyə məşqçi əlavə edib.
Qeyd edək ki, Avropa çempionatı aprelin 23-dən 27-dək təşkil olunacaq.
Anar Həsənov
