AVF rəsmisi Azərbaycan çempionatının istedadlı velosipedçiləri üzə çıxarmasına kömək etdiyini bildirib

Azərbaycan Velosiped Federasiyasının (AVF) baş katibi Elnarə Musayeva şose velosipedi üzrə ölkə çempionatının yekunlarını dəyərləndirib.

Qurum rəsmisi bu barədə "Report"a açıqlama verib.

O, yarışda ümumilikdə 120-yə yaxın idmançının iştirak etdiyini deyib:

"Şose velosipedi üzrə Azərbaycan çempionatı il ərzində keçirilən yarışlar arasında ən əsasdır. Beynəlxalq Velosipedçilər İttifaqının qaydalarına əsasən, bu çempionat iyunun sonunda keçirilməlidir. Dünya üzrə bu yarış məhz bu müddətdə təşkil edilir. Çempionata müxtəlif yaş kateqoriyaları üzrə 120-yə yaxın idmançı qatılmışdı Yarış Xızı rayonunda təşkil olunub və həm isti hava şəraiti, həm də marşrutun çətinliyi idmançılardan böyük əzmkarlıq tələb edib. Digər tərəfdən, bu çempionat istedadlı və yüksək potensialı olan idmançıları üzə çıxarmağa kömək etdi".

AVF rəsmisi yarış zamanı yaşanan maraqlı məqamlardan danışıb:

"Yarış gərgin mübarizə ilə yadda qaldı. Yeniyetmə velosipedçilərin qrup yarışı zamanı ayrılıb önə gedən 4 idmançının biri problemlə üzləşdi. Digərləri isə bu fürsətdən istifadə edərək sürət yığıb uzaqlaşmaq əvəzinə onu gözlədilər. Bu, idmanda yazılmayan etik qaydalardır və "feyr-pley" prinsiplərinə uyğun bir hərəkətdir. Velosiped idmanı zamanı şosedə təhlükəsizliyin təmin olunması çox vacibdir. Təhlükəsizlik yüksək səviyyədə təmin edildi. Buna görə də Daxili İşlər Nazirliyinə və Fövqəladə Hallar Nazirliyinə təşəkkürümüzü bildiririk. Təbii ki, təşkilatçılığa və hərtərəfli dəstəyə görə də Gənclər və İdman Nazirliyinə böyük təşəkkürümüz var".

E.Musayeva velosipedçilərin beynəlxalq yarışlara yollanacağını vurğulayıb:

"Yeniyetmələrdən ibarət yığmamız Makedoniyaya - Avropa Gənclər Olimpiya Festivalına, gənclərdən ibarət komandamız isə Portuqaliyada trek növü üzrə Avropa çempionatına qatılacaqlar".