Idman.biz
Azərbaycan Velosiped İdmanı Federasiyası azərbaycanlı velosipedçi Artyom Proskuryakovda aşkarlanan müsbət dopinq nümunəsi ilə bağlı araşdırma aparır.
Bu barədə İdman.Biz-ə federasiyanın mətbuat xidmətinin rəhbəri Pərviz Musayev məlumat verib.
"Hazırda biz Proskuryakovun orqanizmində qadağan olunmuş preparatların hansı yolla aşkarlanması ilə bağlı araşdırma aparırıq. Bu anda velosipedçi Azərbaycan millisinin heyətindən kənarlaşdırılıb". - deyə P. Musayev bildirib.
Qeyd edək ki, 18 yaşlı Azərbaycan velosipedçisi beynəlxalq velosipedçilər ittifaqı (UCI) tərəfindən müvəqqəti olaraq yarışlardan uzaqlaşdırılıb. Buna səbəb onun analizində metamfetamin maddəsinin aşkar olunmasıdır.
Artyom Proskuryakovda müsbət nəticə bu ilin sentyabrında Ruandanın Kiqali şəhərində keçirilən UCI şosse velosiped idmanı üzrə dünya çempionatında "kəşfiyyat testləri" zamanı götürülmüş iki nümunədə müəyyən edilib. Ona B nümunələrinin analizini tələb etmək icazə verilib.
Testlər gənclərin şosse üzrə qrup yarışından sonra aparılıb. Proskuryakov həmin yarışda finişə çatmayıb, fərdi yürüşdə isə 41-ci yeri tutub.
Maraqlıdır ki, Azərbaycan Milli Antidopinq Agentliyi (AMADA) bu ilin iyul ayının əvvəlində Artyom Proskuryakovu ölkə çempionu olduqdan sonra qadağan olunmuş maddələrə görə yoxlayıb.
"AMADA həmin vaxt Azərbaycan çempionatının bütün mükafatçılarını test etmişdi və idmançılarda, o cümlədən Artyomda heç bir qadağan olunmuş preparat aşkarlanmamışdı. Yəni o zaman o, tamamilə təmiz idi", -P. Musayev vurğulayıb.
Proskuryakovla bağlı insidentdən sonra Azərbaycan millisinin bütün üzvlərinin yenidən test olunub-olunmayacağına gəlincə, Musayev bunun AMADA-nın səlahiyyətində olduğunu qeyd edib.
"Federasiya isə öz tərəfindən bu prosesə hər cür dəstək göstərəcək", - o əlavə edib.
Teymur Tuşiyev
