Idman.biz
81 kiloqram çəki dərəcəsində Tbilisidə keçirilən Avropa çempionatının bürünc mükafatçısı Zelim Tçkayev turnirdəki çıxışını dəyərləndirib.
İdman.Biz-in Tbilisiyə ezam olunan jurnalistinə açıqlamasında cüdoçu nəticədən tam razı qalmasa da, medalın əhəmiyyətini vurğulayıb.
"Bu turnirdə məqsədim qalib gəlmək idi. Amma medal qazandıq və bu, həm mənim, həm də yığmamız üçün ən önəmli məqamdır. Əlbəttə, daha yüksək nəticə istəyirdim", - deyə Zelim Tçkayev bildirib.
Azərbaycan cüdoçusu yarımfinalda Gürcüstan təmsilçisi Tato Qriqalaşvili ilə qarşılaşmasına da toxunub:
"Bəli, yarımfinalda Qriqalaşviliyə uduzdum. Bu, həmin rəqibə ilk məğlubiyyətim deyil, amma burada psixoloji amil yoxdur. Bunun üzərində işləyəcəyik. Nəticə çıxarıb səhvləri aradan qaldırmaq və növbəti dəfə onu məğlub etmək lazımdır", - deyə idmançı qeyd edib.
O, eyni zamanda hakimlərin fəaliyyəti ilə bağlı fikir bildirməkdən imtina edib.
