Idman.biz
Azərbaycan cüdo yığması Avropa çempionatının üçüncü günündə, nəhayət, finala, bəlkə də, qızıl medala çox yaxınlaşmışdı.
İdman.biz xəbər verir ki, millinin iki üzvü - Zelim Tçkayev (81 kq) və Murad Fətiyev (90 kq) yarımfinaladək olduqca inamla irəliləsələr də, sonda onlar da bürünc medalçılar sırasında yer almalı oldular.
Yarışın ilk iki günün mükafatçıları Əhməd Yusifov (60 kq) və Rəşid Məmmədəliyev (73 kq) kimi, Tçkayev və Fətiyev üçün də Avropa çempionatının medalı bir ilkdir. Bu nəticə hər iki yığma üzvü adına heç də sürpriz hal kimi dəyərləndirilə bilməz. Onlar daha əvvəl dəfələrlə Dünya Turu seriyasında yüksək nailiyyətlərlə yadda qalıb.
Zelim Tçkayevin yarış ərzində göstərdiyi performansı göz önünə gətirsək, onun adına "bürünc" sadəcə qazanc deyil, həm də itirilmiş çempionluq anlamına gələ bilər. İlk üç rəqibini, demək olar, bir göz qırpımında "ippon"la məğlub etdikdən sonra o, yarımfinalda gürcüstanlı olimpiya ikincisi, üçqat dünya və Avropa çempionu Tato Qriqalaşvili ilə qarşılaşırdı. Titullarına rəğmən, rəqibindən çəkinməyən Tçkayev görüş ərzində daha aktiv tərəf idi. Ardıcıl hücumlarla rəqibini taqətdən salan 25 yaşlı idmançımız bunun nəticəsi olaraq əsas vaxtda rəqibinə iki "şido" cərimə xalı da verdirməyi bacarmışdı. Artıq hər şeyin qələbəmizdən xəbər verdiyi anda qəbul edilən qərar cüdo hakimliyi adına yetərincə biabırçı, ümumiyyətlə, dünyada durmadan inkişaf edən cüdo idman növü adına utancverici hadisə sayıla bilər. Tçkayevin özünün hücum anında rəqibinin heç bir görünən aktiv hərəkəti olmadığı halda kürəyinin tatamiyə təması hakimlər tərəfindən birbaşa "ippon"la qiymətləndirildi. Belə absurd qərar, kadrların dəfələrlə izlənilməsinə rəğmən, qüvvədə saxlanıldı.
Sadəcə Tçkayevin deyil, Murad Fətiyevi görüşündə də verilən "hansoku-make" qərarı və beləliklə, idmançımızın sonradan çempion olan italiyalı Kristian Parlatiyə məğlubiyyəti birmənalı qarşılanmadı. Bəs hər iki cüdoçumuzun "sıxılmasına" səbəb nə ola bilər? Müxtəlif versiyalar ağla gətirmək mümkündür. Titullu idmançıya qarşı simpatiyadan tutmuş, son illər yüksək inkişaf tempinə nail olan, iki olimpiya qızılı qazanan Azərbaycan cüdosunun uğurlarına qarşı qısqanclıq hissinədək...
Haqsızlığa rəğmən, sarsılmayan cüdoçularımız bürünc medal görüşündə "ippon"la qalib gəlməklə, həm də əsl döyüşçüyə xas iradələrini ortaya qoydular.
Təəssüf ki, dünya idmanının ədalətsiz tərəfi hələ də aktuallığını itirməyib. Bu gün bizim idmançıların üzləşdiyi arzuolunmaz durum nə ilkdir, nə də son. Sabah digərlərinin da bu vəziyyətlə qarşılaşması, layiq olduğu pillədən uzaq qalması istisna deyil... İndiki halda isə Tçkayev və Fətiyevin "bürünc"ü bizim üçün "qızıl" dəyərindədir.
İdman.biz
