Report.az
İyunun 23-də Bakıda keçirilən "UFC Fight Night" turnirində rəqibini nokautla məğlub edərək çempion titulunu qazanan azərbaycanlı UFC döyüşçüsü Nazim Sadıxov Gürcüstanın paytaxtı Tbilisidə azərbaycanlı və gürcü gənc idmançılarla görüş keçirib.
"Report"un Gürcüstan bürosunun məlumatına görə, tədbir yeddiqat dünya və üçqat Avropa çempionu Alim Nəbiyevin təşəbbüsü ilə təşkil olunub.
A.Nəbiyev bildirib ki, görüşün əsas məqsədi gənclər arasında idmana marağın artırılması, onları qarşıdakı yarışlara ruhlandırmaq və dəstək göstərməkdir. Onun sözlərinə görə, belə təşəbbüslər həm idmançılar arasında həmrəyliyi gücləndirir, həm də yeni nəsil üçün örnək yaradır.
Tədbir çərçivəsində Nazim Sadıxov gənclərlə səmimi söhbət aparıb, onların suallarını cavablandırıb və şəxsi təcrübəsini bölüşüb.
UFC döyüşçüsü müsahibəsində Tbilisiyə ilk dəfə səfər etdiyini qeyd edib:
"Səfərimin məqsədi gənclərə motivasiya vermək, onların idmana və qələbəyə inamını artırmaqdır. Bu gün Gürcüstanda yaşayan azərbaycanlılar arasında dünya və Avropa çempionları, beynəlxalq yarışların qalibləri var. Yeniyetmə və gənclər arasında da idmana maraq böyükdür. Məqsədimiz onları ruhlandırmaq, gələcək qələbələrə həvəsləndirmək və Azərbaycan bayrağını beynəlxalq arenalarda daha da yüksəklərə qaldırmaqdır".
Sadıxov Gürcüstanda yaşayan soydaşlarımızın idmana olan marağını yüksək qiymətləndirib və onlara dəstək göstərəcəyini bildirib.
Görüş zamanı birgə məşq təlimi keçirilib, fərqlənən gənc idmançılara dəbilqə və müxtəlif idman aksesuarları təqdim olunub.
Qeyd edək ki, Nazim Sadıxov hazırda UFC-də çıxış edən ilk azərbaycanlı döyüşçülərdən biridir və beynəlxalq yarışlarda uğurla çıxış edir.
