Idman.biz
Oktyabrın 11-də Rio-de-Janeyroda keçiriləcək UFC-nin böyük turnirinin əsas qarşılaşmasında yüngül çəkidə keçmiş çempion Çarlz Oliveyra və reytinqin 10-cu pilləsində qərarlaşan Rafael Fiziyev üz-üzə gələcəklər.
İdman.biz xəbər verir ki, Sport24.ru saytının təqdim etdiyi yazıda Azərbaycanlı döyüşçü üçün bu qarşılaşmanın karyerasının ən böyük fürsəti olduğu qeyd edilib.
Belə ki, bu döyüş onu titul mübarizəsinə bir addım daha yaxınlaşdıra bilər. Halbuki bir müddət əvvəl belə ssenarini təsəvvür etmək də çətin idi.
2022-ci ildə Fiziyev – 6 döyüşlük qalibiyyət seriyası, bir neçə parlaq çıxışa görə bonuslar və perspektivlə reytinqin 7-ci pilləsində idi. Amma 2025-ci ilin aprelində o, ilk onluqdan kənarda, 3 ardıcıl məğlubiyyət yaşamış və ağır zədədən sonra yenicə oktaqona qayıtmış bir döyüşçü idi. Onun "qara zolağı" 2023-cü ilin yazında, Castin Qetjiyə hakimlərin qərarı ilə məğlub olduğu döyüşdən sonra başladı. Rəqib keçmiş müvəqqəti çempion və UFC-nin ulduz döyüşçülərindən biri idi. Rafaelin bir qədər bəxti gətirmədi, amma bu məğlubiyyət onu tam olaraq geriyə atmırdı.
Əsl geriləmə həmin ilin sentyabrında Mateuş Qamrota qarşı döyüşdə baş verdi. Fiziyev bu dəfə diz bağlarının qopması səbəbilə döyüşü vaxtından əvvəl dayandırmalı oldu. Zədə çox ciddi idi və onu il yarım arenalardan uzaqlaşdırdı.
Rafael yalnız 2025-ci ilin martında geri döndü. UFC ona Den Hukerin yerinə həmin Qetjiyə qarşı döyüş təklif etdi. Fiziyev bu fürsəti qaçırmadı. Yenə də üç raund davam edən qarşılaşmaya yaxşı başlasa da, döyüşün ortalarına doğru üstünlüyü itirdi və yenidən hakimlərin qərarı ilə uduzdu.
Bütün bunlar onun titul yarışından birdəfəlik uzaqlaşdığı təəssüratını yaratsa da, 2025-ci ilin iyununda Bakıda keçirilən UFC turnirində Fiziyev vəziyyəti dəyişdi. Gənc və perspektivli döyüşçü İqnasio Bahamondeslə qarşılaşan Rafael çoxlarının onun məğlub olacağını düşündüyü qarşılaşmada əla performans göstərərək üç raundda üstünlük qazandı.
İndi isə UFC-nin rəsmi açıqlamasına görə, Fiziyev oktyabrın 11-də Çarlz Oliveyra ilə döyüşəcək. Bu döyüş onun üçün yalnız reytinqdə irəliləmək deyil, həm də çempionluq döyüşünə yaxınlaşmaq üçün unikal fürsətdir. Niyə məhz Oliveyraya rəqib olaraq Fiziyev seçildi – bunu dəqiq bilmək çətindir, amma görünən odur ki, bu döyüş onun əvvəlki uğursuzluqlarına taleyin cavabıdır.
Oliveyra son dəfə 2025-ci il iyunun 28-də UFC 317 turnirində İliya Topuriya ilə çempionluq döyüşünə çıxmış, birinci raundda nokauta düşmüşdü. Bu nəticə onun hazırda fiziki baxımdan əvvəlki səviyyədə olmadığını göstərir. Üstəlik, 35 yaşı var və bu, döyüşçü üçün ən yaxşı yaş dövrü deyil. Amma Oliveyra UFC tarixinin ən güclü yüngül çəkililərindən biri hesab olunur. O, bir ildən çox UFC çempionu olub və Dastin Porye, Qetji, Maykl Çendler, Toni Fergüson kimi ulduzları məğlub edərək 11 döyüşlük qalibiyyət seriyası ilə zirvəyə qalxıb.
2022-ci ilin payızında o, İslam Maxaçova uduzduqdan sonra karyerasında geriləmə başlayıb. O vaxtdan bəri 4 döyüş keçirib, onlardan ikisində məğlub olub (o cümlədən Topuriyaya). Hazırda isə Oliveyra reytinqdə 4-cü yeri tutur və hələ də dünyanın ən güclü yüngül çəkili döyüşçülərindən biri sayılır.
İdman.biz
