Dünya Kubokunda uğur qazanan Azərbaycan karateçiləri vətənə qayıdıb, təntənəli şəkildə qarşılanıb

Bolqarıstanın Varna və Kamçiya şəhərlərində keçirilən "KWU-SENSHI" üzrə dünya kubokunda uğur qazanan Azərbaycan milli komandası Vətənə qayıdıb.

İdman.biz xəbər verir ki, yarışda yüksək nəticə qazanan idmançılarımız Heydər Əliyev adına Beynəlxalq Hava Limanında böyük coşqu ilə qarşılanıb.

Milli komandaya rəhbərlik edən Azərbaycan Karate Federasiyasının baş katibi və "KWU-WFKF" üzrə Azərbaycan nümayəndəsi Qabil Sayadov, komandanın çıxışını uğurlu qiymətləndirib və yaradılan yüksək şəraitə görə ölkə başçısı İlham Əliyevə, Federasiyanın prezidenti Ülvi Quliyevə və idarə heyətinə dərin təşəkkürünü bildirib: "Bu nəticələrin təməlində ölkəmizdə idmana göstərilən diqqət və federasiya rəhbərliyinin davamlı dəstəyi dayanır. Biz bu etimada layiq olmaq üçün əlimizdən gələni edirik. Yarışda fərqlənən iki idmançımız Selcan Babayeva (16-17 yaş, +65 kq) qızıl, Cavid Kazımlı (16-17 yaş, +75 kq) isə gümüş medal qazanaraq Azərbaycanın idman tarixinə növbəti uğurlu nəticələri yazdırıblar. Gənc karateçilərin bu nailiyyəti onların şəxsi məşqçiləri Vidadi Xəlilov və Vüsal Məmmədovun uzunmüddətli zəhmətinin və peşəkar hazırlıq prosesinin bariz nümunəsidir..

Gələcək planlara toxunan Qabil Sayadov bildirib: "SENSHI" yarışları dünya səviyyəsində yüksək nüfuza malik platformadır. Qarşıdakı aylarda bu arenada daha güclü heyətlə çıxış etməyi planlaşdırırıq. Təlim-məşq prosesi artıq mərhələli və sistemli şəkildə təşkil olunub. Məqsədimiz yalnız medallar qazanmaq deyil, həm də Azərbaycan karatesini beynəlxalq arenada sistemli şəkildə tanıtmaq və möhkəmləndirməkdir."

Milli komandamızın yeniyetmə və gənclər üzrə baş məşqçisi Elpərəs Sayadov da yarışın hazırlıq mərhələsində gənc idmançıların inkişafında xüsusi rol oynayıb. Onun rəhbərliyi ilə gələcək nəsil karateçilər sistemli və mərhələli şəkildə beynəlxalq arenalara hazırlanır.

İdman.biz