Idman.biz
Azərbaycan Karate Federasiyasının nəzdində fəaliyyət göstərən "KWU-WFKF" Birliyi üzrə millisi Bolqarıstanın Varna və Kamçiya şəhərlərində keçirilən "KWU-SENSHI" (Dünya Kyokuşin Birliyi) üzrə Dünya kubokunda 2 medal qazanıb.
İdman.biz xəbər verir ki, iyulun 6-dan etibarən start götürən yarışın ilkin mərhələsində iki idmançımız mükafata layiq görülüb.
Selcan Babayeva (16-17 yaş, +65 kq) qızıl, Cavid Kazımlı (16-17 yaş, 75+ kq) gümüş medal əldə edib.
Azərbaycan yarışda ümumilikdə 19 idmançı ilə təmsil olunur. Onlardan 14-ü (kyokuşin karate üzrə) artıq mübarizəyə qoşulub, 5 idmançı isə böyüklər arasında keçiriləcək "SENSHI" yarışlarında iştirak edəcək. Onların çıxışları növbəti günlərdə baş tutacaq.
Dünya Kyokuşin Birliyinin 37 ölkə üzrə rəsmi nümayəndəliklərinin yığmalarının qatıldığı yarışda yığmamız Azərbaycan Karate Federasiyasının baş katibi, həmçinin "KWU-SENSHI" üzrə nümayəndəsi Qabil Sayadovun rəhbərliyi ilə iştirak edir.
Hazırda təlim-məşq toplanışı və yarışlar davam edir. Millinin qarşıdakı günlərdə daha bir sıra uğurlara imza atacağı gözlənilir.
Qeyd edək ki, Azərbaycan Karate Federasiyasının "KWU-SENSHI" Birliyi üzrə rəhbəri Ramin Əsədovdur.
İdman.biz
