Idman.biz
"Quba" klubunun kapitanı Zaur Paşayev son qarşılaşmalar və mövsümün ümumi gedişi barədə danışıb.
İdman.Biz xəbər verir ki, o, komandanın "Sərhədçi" ilə oyunda uduzmasının əsas səbəbini arxayınlıqla əlaqələndirib və bu halın rəqibə əlavə güc verdiyini bildirib.
Paşayev deyib ki, matçın müəyyən anlarında 15–17 xal fərqlə öndə olsalar da, diqqətsizlik son dəqiqələrdə oyunun gedişatını dəyişib: "Belə görüşlərdə boşluq vermək olmaz. Basketbol 40 dəqiqəlik oyundur. Bir anlıq rahatlıq rəqibin geri qayıtmasına səbəb olur."
Kapitan əlavə edib ki, oyunçularla görüşdən sonra ciddi söhbət olub və komanda artıq növbəti — "Ordu" ilə qarşılaşmaya tam şəkildə hazırlaşıb. Onun sözlərinə görə, rəqibi yaxşı tanıyırlar və qələbə üçün mübarizə aparacaqlar.
Paşayev komandanın ehtiyat skamyasının zəif olmadığına diqqət çəkib: "Keçən il B qrupunun büdcəsi başqa idi, bu mövsüm başqa. Bu il B liqa daha çox 2-ci Liqa kimi sınaqdan keçirilir. Cavanlar oynayır, vaxt alırlar."
O, mövsümə yaxşı başlasalar da, ardıcıl üç məğlubiyyətin komandanı çətin vəziyyətə saldığını, lakin hələ də həm birinci, həm də ikinci pilləyə yüksəlmək şanslarının olduğunu vurğulayıb.
Təcrübəli basketbolçu çempionatın səviyyəsinin yüksəldiyini, Superliqa və 2-ci Liqa modelinə keçidin Azərbaycan basketbolu üçün faydalı olacağını qeyd edib: "Belə çempionat ölkəmizdə demək olar ki, olmayıb. Superliqa 10, 2-ci Liqa isə 6 komanda olsa, daha maraqlı olar."
Paşayev həmçinin klubun sponsor axtardığını bildirib: "ABF bizə dəstək olur. Əlavə sponsor tapsaq, daha da güclənərik. B qrupunda bütün komandalar lider olmaq istəyir, biz də elə."
