Idman.biz
Almaniyanın Reyn-Rur regionunda keçirilən Universiadada Azərbaycanın çimərlik voleybolu komandalarının çıxışı qrup mərhələsi ilə məhdudlaşmayacaq.
İdman.biz-in Almaniyaya ezam olunmuş əməkdaşı xəbər verir ki, Nəriman Bayramlı – Ayxan Abdullayev kişilər cütlüyü və qadınlardan ibarət Səbinə Əlizadə – Fidan Əhmədxanova tandemi qrupda keçirdikləri hər üç oyunda məğlub olublar.
Lakin yarışın reqlamentinə əsasən, qrup mərhələsində nəticədən asılı olmayaraq bütün komandalar mübarizəni davam etdirir. Sadəcə, aparıcı cütlüklər medallar uğrunda oynadıqları halda, digərləri aşağı yerlər uğrunda mübarizə aparırlar.
17-24-cü yerlər uğrunda keçiriləcək mərhələdə Səbinə Əlizadə və Fidan Əhmədxanova Çili təmsilçiləri Marsela və Dana ilə qarşılaşacaqlar. Nəriman Bayramlı və Ayxan Abdullayev isə bu mərhələdə Rumıniya cütlüyü – Alb və Mureşanla üz-üzə gələcəklər.
Zəki Feyzullayev
İdman.biz
