"Bu mövsüm mənim üçün çətin sınaq oldu".

İdman.biz xəbər verir ki, bunu Azərbaycan millisinin voleybolçusu Dmitri Baranov deyib.

Sosial şəbəkə hesabında paylaşım edən "Xilasedici"nin 31 yaşlı blokçusu bildirib ki, mövsümün startında bir sıra problemlərlə üzləşib: "Əməliyyat, reabilitasiya, ağrı - hər gün təkcə sağlamlığım üçün yox, həm də xəyallarım üçün mübarizə aparırdım. Demək olar ki, heç ümid qalmamışdı, amma təslim olmadım. Ətrafımda ümidlərdən çox şübhələr olsa da, inanırdım ki, geri qayıda bilərəm. Əsas əməliyyatdan üç ay sonra artıq yenidən meydandaydım. Statistikalar üçün, alqışlar üçün yox - özüm üçün, komandam üçün, bir vaxtlar ilk dəfə top götürən o oğlan üçün. Sadəcə təslim olduqda uduzarsan. Mən təslim olmadım. Bu sözlər hər səhər, hər məşq, hər dəfə meydanda olduğum anın mənasına çevrildi. Mənimlə bu çətin yolu qət edən hər kəsə - ailəmə, məşqçilərimə, həkimlərimə, azarkeşlərimə və "Xilasedici"dəki qardaşlara minnətdaram".

Azərbaycan çempionatını bürünc medalla bitirən Baranovun sözlərinə görə, artıq millinin düşərgəsinə qoşulmağın zamanıdır: "Bilmirəm qismətimə neçə mövsüm daha yazılıb. Amma ürəyim döyündüyü, ayaqlarım məni daşıdığı müddətcə oynayacağam. Döyüşəcəyəm. Xəyallar quracağam. İndi yeni bir fəsil başlayır - Azərbaycan milli komandası".

Qeyd edək ki, kişi voleybolçulardan ibarət Azərbaycan millisi Gümüş Avropa Liqasında mübarizə aparacaq. Yarış iyunda start götürəcək.

İdman.biz